الرئيسية » خبر رئيسي متحرك » أحمد السعدني ينعي زوجته

أحمد السعدني ينعي زوجته

كتب: مصعب أشرف

أضاف أحمد السعدني منذ قليل منشوراً على موقع التواصل الإجتماعي فيسبوك ينعي فيه زوجته المتوفية ذاكراً فيه بعض التفاصيل عن حياتهما وأسباب الطلاق وماهية العلاقة كما بدأ المنشور بأنه لم يتحدث يوماً عن أحد كما سيتحدث عنها فقال “عمري في حياتي ما اتكلمت عن حياتي الشخصية لكن حسيت اني لازم اعمل كده دلوقتي” واتبعه بتفاصيل بداية معرفته بها حيث قال:

“يوم ٩/٩/٢٠٠٣ حب من اول نظرة في الشارع ما بين معهد السينما حيث كانت تدرس و معهد فنون مسرحية حيث كنت الهو و ادرس برضه ميضرش كنت راكب عربيه و كانت ماشية علي رجلها كنت هخبطها لكن حصل خير لا محصلش قوي خبطتتي هي في قلبي حب تقطيع شرايين”

واضاف السعدني موضحاً بعد ذلك سبب المشكلة التي كانت بينهما والتي أدت بهم في نهاية الأمر للطلاق:

“سنة خطوبة سنة كتب كتاب شهر جواز خلفت اول ولد هنا بدأت المشكلة اللي بكتب الكلام ده عشانها
انا زي كتير للاسف شباب anti تحمل مسئولية بص لنسب الطلاق و انت تفهم انا بيجيلي ارتيكرية لما احس اني مسئول و هي برضه حبيبتي زي بنات كتير بتقول طلقني اكتر مبتنطق اسمي كانت النتيجة في اول سنة بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي اول طلقه
قشطه يا باشا عشت حياتك ؟ اه …ارتحت ؟؟ لا
وحشتني وحشني حنيتها و حبها و هبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني لا تصدق نفعت الجانب الاناني في شخصيتي غلبني يا عم كبر مخك و عيش حياتك المشكله اني عمري مارتحت كنت عايز حضنها و حنيتها و هبلها بس كنت بأجل الرجوع يمكن اكبر او اعقل او اقدر اتحمل المسئوليه بجد حددت لنفسي سن معين ارجعلها فيه قال يعني حبقي نضجت ”

اوضح في النهاية كيف توفيت زوجته وبكلمات يملؤها الندم اعلن السعدني ندمه وانه لم يكن ابداً يحسب حساباً لما حصل:

“حددت لنفسي سن معين ارجعلها فيه قال يعني حبقي نضجت بس ملحقتش
ماتت في لحظه كانت بتكلمني قبلها بساعه و مكنتش عيانه كان عندها ضغط زي اغلب الشعب المصري الحمد لله
ماتت و مشيت و قررت تسبني للابد كنت فاكرها حتستناني و متاكد من ده مستحيل تحب حد غيري مجاش في بالي انها ممكن تموت دلوقتي صغيره و اكتر واحده في حياتي شفتها بتحب الحياه و عندها طاقة ايجابيه
ماتت و سابتلي الولدين و الندم
انا متاكد انك في الجنه رحتي للي خلقك يوم عرفه و اميره و ست البنات و الستات و نضيفه و كريمه و صنتي ولادي و بيتي
بحبك يا امل حياتي اللي اتهد و بوعدك المرادي حشيل المسئوليه للاسف اتعلمت الدرس بس بعد ما اتحرمت من حنيتك و حضنك و ولادك كمان اتحرموا من احن ام ربنا يقدرني و اربيهم احسن ما كنتي عايزه بحبك و مش بطلب منك غير انك تسامحيني
ربنا يرحمك و يرحمني و يرحم ولادنا يا حبيبة عمري الوحيدة “

والجدير بالذكر ان زوجة الفنان أحمد السعدني فارقت الحياة يوم الجمعة ،10 من شهر أغسطس. و كان السعدني قد تزوج منها في سن صغير، وأنجب منها ياسين وعبدالله، ولكنهما انفصلا بعد ذلك ولم يعلن انفصاله عنها إلا منذ شهور قليلة رافضاً الدخول في أي تفاصيل أو ذكر أي معلومات عن حياته الخاصة.

شاهد أيضاً

المحايد تهنىء الزميلة “مريم عبد الحكيم” بعيد ميلادها

تتقدم جريدة المحايد الإخباري بخالص التهانى القلبية للزميلة “مريم عبد الحكيم” الصحفية بجريدة الفجر، بمناسبة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*