الإمتحانات في عيون طلاب الثانوية العامة وإستعدادهم للتنسيق

كتب: حسام بدران عبدالعال

الأسئلة كتير تدور حول الثانوية العامة السنة دي، من حيث النظام الجديد و الأمتحانات الصعبة وضغوط جدول الأمتحانات، وأراء طلاب الثانوية العامة في مجموعهم والتنسيق للكليات وهل فعلا كلام الوزير هيتحقق أن كل الطلبة هتدخل كليات؟.

كانت البداية مع خالد بدران 19 سنة علمي رياضة 75%، حيث قال أن النظام كويس ووحش في نفس الوقت يعني كاسئلة مش متعودين عليها وكمان أفكار عالية فهي دي المشكلة لكن كنظام كويس بس مش كل حاجة موجودة في الكتاب، وكنت ناوي علي كلية تجارة لإن التنسيق هو اللي بيحكم صحيح التنسيق كان كويس بس المجموع وحش جدا، حلمي أكون مهندس.

يؤكد يوسف محمد 18 سنة الحاصل علي 89% علمي علوم، أن النظام وأنا من أولي ثانوي متعود عليه بس المشكلة أني اللي مذاكر هيدخل يحل واللي مش مذاكر ربنا معاه، التنسيق كان كويس بس المجموع وحش جدا، الإمتحانات كانت صعبة جدا وفي نفس الوقت داخلين بالكتاب وهو مفيهوش أي حاجة، تضيع وقت علي الفاضي، بالنسبة ليا ناوي علي كلية علوم وبرضو علي حسب التنسيق لأني كنت حابب كلية طب.

أضافت ملك مصطفي 18 سنة، أن الدخول بالكتاب مش هيفيدني في الإمتحان بالعكس هيضيع مني وقت أني أنا أفضل أشوف الإجابة في الكتاب فكده هيضيع مني وقت كبير اوي، أنا جبت 68 % أدبي وناويه علي كلية إقتصاد وعلوم سياسية، كنت حابه أدخل كلية ألسن بس المجموع وحش جدا.

أكدت ندي محمد 18 سنة الحاصلة علي 63.5 % أدبي، أن الإمتحانات كانت صعبة جداً ومكنتش متوقعة كده بس عملت اللي عليها وشايفة أن التنسيق فيه ظلم لأدبي، تنسيقيها مرحلة ثانية، ناوية علي كلية إقتصاد وعلوم سياسية، حلمي أكون سفيرة خارجية.

وضح هشام محمد 18 سنة الحاصل علي 85 % علمي علوم، ان الأمتحانات فوق مستوي الطالب العادي والمتوسط كمان والتنسيق وحش جدا وقال أنه هيشوف التنسيق لو كان كده بإذن الله هدخل كلية علوم أو كلية حاسبات ومعلومات، حلمي أكون دكتور جامعي.

أشار محمود زاكي 18 سنة الحاصل علي 81 % علمي رياضة، أن الإمتحان مش جاي من الكتاب ولا جاي من أي حته يعني هو يقولك ايه مش من الكتاب بس من المنهج طيب أزاي ده، يعني أنا بدخل بالكتاب بس مفيهوش حاجه وأنك تدخل بالكتاب زي كأنك مدخلتش بيه، أنا ناوي علي كلية هندسة لو كان التنسيق هيدخلني هندسة، التنسيق كويس ومش كويس، كويس أن الكل هيدخل كليات، أنا حلمي أكون مهندس بترول.

أكد بلال عبدالرحمن 18 سنة الحاصل على 58 % أدبي، أن لو وعد الوزير اتنفذ يبقي اللي جايبين 50 أو 60 % هيدخلوا كليات اللي كانوا بيدخلوها 70 أو 80 % اللي هي زي حقوق و تجارة وحاجات بسيطة، التنسيق كان كويس بس المجموع وحش خالص وكنت حابب كلية تجارة بس مش عارف التنسيق هيدخلني آيه، حلمي بقا أكون محاسب في بنك.

رأي حمزة محمد 18 سنة حاصل علي 80 % علمي رياضة، أن جدول الأمتحانات مش وحش بس مضغوط شوية يعني هو مفيش غير يوم واحد بس بين كل مادة ومادة بس متقسم المواد حلو، مادة زي مادة الإنجلش في آخر الجدول كويس، أسبوع العيد كان كويس اننا نذاكر مادة أو أثنين من المواد المضغوطة، شايف أن التنسيق لا هو كويس ولا وحش بس المجموع هو اللي وحش جدا مع اللي مذاكرش، ناوي إنشاء الله علي هندسة ولو ربنا موفقش هدخل أي كلية، حلمي أدخل كلية هندسة وأكون مهندس معماري.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *