أحمد رمزي شاب بالرغم من صغر سنه إلا أنه يساير التطور الذي يحدث في العالم من تكنولوجيا، وقد ظهرت مسايرته هذه في تألقه في نوع جديد من الرسم يحتاج إلى الكثير من الإبداع والدقة وليس يحتاج إلى فرشاة ولوحة فقط، وهذا النوع الجديد يُدعي الفيكتور أو كما يقولون الرسومات الحاسوبية، من خلال حواره مع جريدة المحايد الإخباري قد كشف لنا أبرز التصريحات حول حياته وهوايته.
في بداية حوارنا حابين نعرف القراء بحضرتك …
أنا أحمد رمزي عندي 17 سنة من محافظة الإسكندرية، طالب في الصف الثاني الثانوي .
حدثنا عن موهبتك؟ وكيف كانت بدايتك؟ وإزاي قدرت تطورها ؟
بدأت أرسم فيكتور آرت من حوالي سنة و نص و كانت بداية مش أحسن حاجه أكيد بس واحدة واحدة بقت تظبط معايا و اتفرج على فيديوهات كتير علي اليوتيوب عشان اتعلم منها أكتر، اليوتيوب حالاً تقدر تتعلم من عليه أي حاجة تتخيلها موجودة عليها فيه، أنا المستوي بتاعي اتطور لما اتفرجت كتير و شوفت رسومات كتير و نفذت كتير بقيت أغلط مره و أتنين و تلاتة و اتعلم من الغلطة دي و اشتغل عليها و اعالجها.
هل لدراستك علاقة بتنمية موهبتك؟
دراستي لحد حالا ملهاش علاقة بشغلي بس نفسي اخش كلية فنون جميلة قسم متخصص بالجرافيك و الخدع السينمائية.
ماهي طبيعة نوع الرسم اللي بتفضله في لوحاتك ؟
و أنا صغير كنت بحب ارسم بالورقة و القلم و اشخبط عادي زي أي طفل بس كبرت مبقيتش حابب الرسم بالأيد، وبقيت دلوقتي بفضل إن كل رسوماتي تكون فيكتور آرت و بوب آرت و ساعات فلات آرت دول المفضلين عندي.
ما هي أكثر الموضوعات التي تجسدها لوحاتك ؟
من أكتر المواضيع اللي بحب ارسمها صور للرياضين عشان ليهم جمهور كبير و بيساعدوني لما أرسم حاجه جديدة ليهم
ما أكثر أعمالك المحببة لك؟
أكتر رسومات فعلاً بحبها رسمة بيج رامي و محمد صلاح و النجم البلجيكي فاندام و حاوي النادي الأهلي وليد سليمان و رسمتي وقت أحداث حي الشيخ جراح بفلسطين الحبيبة
لوحة من لوحاتك كانت سببا في تحقيق نجاحاً لك ، ماهي هذه اللوحة ؟
أكتر لوحة أثرت في مشواري وسببت نجاح كبير ليا بعد توفيق ربنا كانت لبطل مستر أولمبيا بيج رامي كانت بأسلوب البوب ارت و بيج رامي نزلها عنده علي انستجرام يومها و حققت نجاح كبير الرسمة و شكرني عليها و دعمني جامد جداً هو و رابر أسمه أحمد بسيوني و ماما و بابا دعموني جداً بعد الرسمة دي.
أيه اللي بيميزك عن غيرك في نفس المجال؟
مش هعرف أحدد بالظبط ايه ال بيميزني عن غيري عشان ممكن حد يقول تكبر أو نرجسية بس أنا بحب أسلوبي في رسم طبقات الوش و التنفيذ و الأسلوب اللي بشتغل بيه.
كلمنا عن تجاربك مع المعارض الفنية..
انا مشاركتش قبل كدا في اي معرض فني، وكان نفسي أشارك في معرض برسوماتي السنة الفاتت بس معرفتش بسبب ظروف الكورونا.
إيه الرسمة اللي رسمتها وبتتمني إنها توصل لصاحبها؟
الرسمة اللي بتمني إنها توصل لصاحبها هي رسمة محمد صلاح الأخيرة اللي رسمتهاله بعد ما سجل 100جول مع ليفربول في البريميرليج نفسي إنه يشوفها و ينزلها عنده.
هل يوجد فناناً معيناً تريد أن تصل لوحاتك لنفس مستوي لوحاته؟
فيه أكيد رسامين فيكتور أجانب نفسي أوصل للمرحلة بتاعتهم بس فرق إمكانيات و خامات مش مساعد أوي، بس أن شاء الله هوصل للمستوى ده في يوم من الايام .
في نهاية حوارنا ممكن تقولنا بعضاً من أحلامك المستقبلية؟
بالنسبة لرسم الفيكتور نفسي أوصل لمستوى أنك متعرفش تفرق بين الرسمة و الأصل الموضوع صعب شوية بس بتمنى من ربنا اني احققه، و عايز بردو اقفل 500رسمة ف خلال أول تلات سنين، رقم كبير اه بس هقدر احققه إن شاء الله، وإني اقدر اجتهد في ثانوية عامة وادخل كلية فنون جميلة.