حصريا.. ” أميرة كويس” صاحبة لقب أميرة القلوب في حوار خاص مع المحايد الاخباري: والدي الداعم الأساسي لي

حصريا.. ” أميرة كويس” صاحبة لقب أميرة القلوب في حوار خاص مع المحايد الاخباري: والدي الداعم الأساسي لي

حوار: اسماء محمود مقلد

تشرفت جريدة المحايد الاخباري بالحوار الصحفي مع المنشدة” أميرة كويس”، بنت محافظة المنيا صاحبة لقب أميرة القلوب لصوتها العذب الجميل، في هذا الحوار صرحت لنا كيف كان طريقها مع الانشاد ونقاط آخرى مهمة بالنسبة لها في هذا المجال:- معنا إلى نص الحوار لنعرف المزيد.

حدثيني أكثر عن من هي أميرة كويس التي زلزلات السوشيال ميديا بصوتها…؟

“بسم الله الرحمن الرحيم” أنا إسمي أميرة كويس عمر، من محافظة المنيا مركز مغاغة قرية بلهاسة طالبة في الصف الأول بالثانوية الأزهرية أدبي، منشدة دينية ربنا بعتلي موهبة الأنشاد وأنا في المرحلة الاعدادية.

 من هو مكتشف أميرة كويس…؟

اللي اكتشفتني الأخصائي الاجتماعي بالمعهد الأزهر الأستاذة” فاطمة أحمد” ، وأنا في الصف الأول الإعدادي من خلال الإذاعة المدرسية كنت بغني أغنية قمرا سيدنا النبي، بعدها طلبتني أستاذة فاطمة وشجعتني إني أدخل مسابقة الأنشاد بالمنيا وفعلا دخلت المسابقة واخدت المركز الأول على المحافظة والمركز التاني على الجمهورية، دي كانت بدايتي في الأنشاد، بعد كده جاءت فترة كورونا وأنا في الصف الثالث الاعدادي في الأيام دي بدأت إني أشتغل اخدتها من ناحية أنه مفيش دراسة وكدة فأكبر وانمي موهبتي اكتر، وكان أول عمل ليا ” المسك فاح”، ودي جابت نجاح كبير الحمدلله جاب اكتر من 9 مليون مشاهدة ونص مليون شير، كانت حاجة حلوة وعجبت الناس جدا، عملت بعدها ” سيدنا النبي حنين” ودي بردوا أعجب الناس كتير.

 هل واجهتي نقد واعتراض في البداية خصوصا أنك من مجتمع صعيدي…؟ وما هو رد فعلك…؟

كل اللي كان بيتوجهلي أن أم كلثوم كانت منشدة في البداية وبعد كدة اتجهت للغناء.

كان ردي عليهم بأن أم كلثوم أنشدت وغنت وماتت على الغناء.

فيها اي لما أميرة كويس تنشد وتموت على الانشاد.

يعني مثلاً لما يجي حد من بعدي أنا وعنده موهبة الانشاد، هيقولوله ده انت هتغني زاي أم كلثوم رد فعل الشخص ده لما يكون عارفني هيقول أميرة كويس كانت منشدة وماتت على الأنشاد.

https://youtu.be/GspnIEHvYK4

هل أصبح لك مردودا مادي على شغلك…؟

تصدقيني لو قولتلك لسه مفيش اي كسب مادي حتى لأن.

ودي ممكن تكون مفاجاه على البعض، زائد إني أنا اللي بدفع أقل حاجة في الانشودة والواحدة 3 ألف جنية لحد ما تطلع للجمهور.

أنا الأهم عندي انمي موهبتي وحتة المقابل المادي هيجي بعد كدة أن شاء الله.

ودائماً والدي يقولي دي تجارة مع الله، لزيادة حب الناس في الله ورسوله من خلال الأنشاد، فهو دائما يقولي كدة.

 من هم الداعمين الأساسيين لأميرة كويس…؟

أكتر شخصية بتدعمني دائما والدي أنا دلوقتي واخدة كل حياته هو اللي بيروح معايا اي مكان تصوير حفلات اي حاجة هو دائما معايا.

فعلاً أنا واخدة اكتر من حقي كمان ربنا يباركلي فيه، وبعد والدي أمي أخواتي وأصحابي وجمهوري.

أكتر حاجة أنا معجبة بيها أن الناس بتحب تسمعني.

كيف تديري وقتك ما بين الدراسة والانشاد…؟

الأنشاد مش واخد كل يومي يعني في البيت شوية على الموبايل شوية مذاكرة شوية في الأنشاد مفيش حاجة منهم بتاخد كل وقتي .

ولاني بدأت شغل اكتر في أيام كورونا فمكنش في اي صعوبة.

وحالياً في الدراسة لو حاجة عجبتني بحفظها على طول مش بتاخد معايا وقت كبير.

ممكن في تلاتة أيام أكون حفظتها وجهزتها وكل حاجة تكون تمام.

 هل أتعرض عليك شغل جديد خاص بيكي أنتي…؟

اه اتعرض عليا اكتر من حاجة لبعض الشعراء من أماكن مختلفة.

ولكن محصلش نصيب من ناحية تخليص بعض الإجراءات ومن ناحية تانية أنا مكنتش حاسة أنه هو ده اللي عايزة اعمله.

من الأعمال اللي بعملها في حاجات كتير منها بتكون مثلاً واقفة على عدد محدد من المشاهدات.

بشوف العمل ده واشتغله أنا بطريقتي الخاصة ازاي!!! .

بدخل الإبتسامة و الروح يعني بيكون فيه إحساس وأنتي بتشوفي الأنشودة بتحسي أنك بتسمعيها لأول مرة .

وده كان رأي الناس بعد ما أنزل الانشودة، لذلك بلاقي المشاهدين بيذيدوا عن ما كانت في الأول بشكل كبير.

بالنسبة للتعليم نفسك تكوني اي في المستقبل…؟

أنا كأميرة نفسي أطلع ظابطة في الحربية، وفي الأنشاد أكون منشدة عالمية في الوطن العربي.

 ما هي نصيحتك لأصحاب المواهب وهم في بداية الطريق…؟

أول حاجة الثقة في ربنا دايما مع وجود دعم الأهل طبعاً لأن كتير عندهم مواهب بس بسبب عدم وجود الدعم الكافي من الأهل المواهب دي بتختفي، والثقة بالنفس والتواضع أهم حاجة لأسباب النجاح.