روان القباني ابنة رشيد، فتاة ظهرت عليها اللمسات الفنية منذ مراحل تعليمها الأولى ثم واصلت حلمها حتى التحقت بكلية الفنون الجميلة جامعة الأسكندرية.
في البداية عرفنا بنفسك..
“أنا روان القبانى عندي20سنة، من رشيد، بدرس في كلية الفنون الجميلة قسم ديكور جامعة الأسكندرية”.
هل في بداية تعلمك للرسم كان في حد بيشجعك؟ وكمان امته بدأتى ف إنك تاخدي خطوة التعلم؟
“بابا كان أكتر واحد بيشجعنى ولسه بيشجعنى لدلوقتى وماما بردو كانت دايماً بتشجعنى، من وأنا صغيرة برسم بس رسم الأطفال اللي هو مش ملتزمة بقواعد لحد مابدأت افهم قواعد الرسم الصح وبدأت اتمرن كتير وانمى موهبتى ولسة بتمرن لحد دلوقتي”.
إزاي قدرتي تطوري من مستواكي؟
” التطور فى المستوى كان بالممارسة وكنت لما بشوف رسم لفنانين كبار وأشوف تكنيك جديد كنت بطور من نفسي إنى اتعلم واحاول اقلده واتدرب عليه وإني اشتغل خامات أكتر وبخامات جديد “.
هل لدراستك علاقة بتنمية موهبتك؟
لاء مش بنسبة كبيرة يعنى ممكن بنسبة 10٪ لأن أنا كنت داخلة فنون جميلة من الأول علشان بحب الرسم وكنت فاكرة زى كل الناس إنى هدخل ارسم كتير بقى وحياتى هتبقى كلها رسم،
لكن الموضوع طلع مختلف، أنا جبت فى ثانوية عامة 96%وكنت أدبي وكان حلم حياتى فنون جميلة ودخلت فنون جميلة إسكندرية وعشان قسم ديكور بياخد مجاميع عالية من أدبي فدخلت قسم ديكور وقسم ديكور هندسي أكتر ماهو فرى هاند يعنى أحياناً موهبتى بتساعدنى فى بعض المواد فى القسم لكن مش كلها، وبكدا تنمية موهبتى فى الرسم كان سببها الممارسة لأن الأيد لما بتتمرن كتير بتطور في الرسم أكتر .
هل في فنان بتتمني مستواكي يطور لحد ماتوصلي لمرحلته؟
“لاء مفيش حد نفسي اوصل لمرحلته لأن لكل فنان لمسته فى الفن مش كل فنان يعرف يكون زى فنان تانى أو يتبع نفس أسلوبه ويطلع نفس النتيجة حتى مع أتباع نفس الأسلوب النتيجة أكيد هتكون مختلفة “.
روان بتحبي أي نوع من الرسم؟
“بحب انواع كتير، بس أنا أكتر حاجة بحب ارسمها هي البورتريه والطبيعة الصامتة مع إني فى الأول مكنتش بحب رسم الطبيعة الصامتة بس لأني في قسم ديكور فالشغل هندسي فيها أكتر ماهو فرى هاند ومع احتفاظى بموهبتى وحزنى عليها اللي هو لاء أنا عاوزة ارسم.. فكان موجود عندنا مادة رسم وهى دى المادة اللى بتنفس فيها شوية بس علشان أغلب مشاريعها كانت بتكون طبيعة صامتة فأنا حبيت الطبيعة الصامتة بقى “.
هل شاركتي في مسابقات أو في معارض رسم من قبل؟ وهل حصلتى على جوائز ؟وايه اكتر عمل بتحبه في شغلك؟ وليه؟
” اه شاركت فى معرض وايت روز فى نسخته التالتة وكنت رسمتله تلات لوحات لحد ماقتنعت بلوحة إنى اشارك بيها وكانت لوحة لموديل فرعونى تشبه نفرتيتى لأنها بتتميز بملامح فرعونية وكانت أول لوحة استخدم فيها ورق الذهب وكانت تجربة حلوة جداً ويعتبر هي أكتر لوحة بحبها دلوقتى لأن رسمتها فى وقت كبير وكنت براحتى مش مستعجلة إني اخلصها “.
بتحلمي بايه في المستقبل بالنسبة لمجالك الفني ؟
” بحلم اوصل لنقطة انى اكون وصلت لمرحلة الرضا التام عن مستوايا فى الرسم”.
تحبي تختتمي حوارنا بأيه؟
” حابة اختتمه بنصيحة للناس اللي حابة تبدأ وتتعلم الرسم،
الرسم اه موهبة لكن أى حد يعرف يرسم ويقدر يرسم لو بس شال من دماغه فكرة ” انا مش بعرف ارسم “بالعكس جرب تتعلم.. ما أحنا كلنا مش مولودين فنانين أحنا كلنا جربنا نرسم ونتعلم فبالتالى بقينا نعرف نرسم، لأن الرسم جميل وعالم تانى تقدر تخرج من العالم بتاعك، وكمان تقدر تخرج كل الطاقة الجواك فيه، وياريت اللى حابب الرسم يتعلم رسم وميقولش مش بعرف ارسم لإنه مع الوقت هيلاقي نفسه بيعرف يرسم كويس خالص”.
