شادى محمد في حوار خاص للمحايد.. “أيوه” أنا الكابتن التاريخي للأهلي..والخطيب أحرجنى بأخلاقه

 حوار/ هدير أحمد

صائد البطولات والألقاب و الأبرز في تاريخ النادي الأهلي، حيث رفع أكبر كم من الكؤوس على منصات التتويج وحصل على بطولات كثيرة جدًا مع جيل هو الأفضل في تاريخ الأهلي.

واحد من أهم لاعبي الأهلي على مر التاريخ وممن صنعوا تاريخ في القلعة الحمراء في مصر، ومختلف البلاد العربية هو “شادي محمد ” إبن النادي كما تلقبه الجماهير.

حصد عددًا من الميداليات الذهبية والفضية التى توج بها أثناء لعبه بتيشرت الفريق الأحمر.

لعب 192 مباراة للأهلي، سجل خلالها 17 هدفًا.

ظهر بقميص المنتخب الوطني في 27 مباراة، سجل خلالها هدفًا واحدًا، وحصل مع المنتخب الوطني ببطولة أمم إفريقيا عام 2008 في غانا.

حصل على ميداليات ودروع من النادي الأهلي والمنتخب المصري بالإضافة إلى وسام الجمهورية.

-توج شادي محمد مع الأهلي بـ5 بطولات لدوري أبطال إفريقيا.

– حصل على 5 ألقاب للدوري العام.

– فاز بالسوبر المصري 5 مرات مع الأهلي من غريمه نادي الزمالك.

– حصد لقب كأس مصر مع الأهلي 7 مرات.

– نال المركز الثالث بمونديال كأس العالم للأندية في 2006 مع الأهلي.

– فاز بلقب كأس الأمم الإفريقية مع منتخب مصر في 2008.

قرر الرحيل عن الأهلي في موسم 2009 – 2010 لينهي مشواراً حافلًا بالبطولات مع القلعة الحمراء.

يعتبر شادي أكثر اللاعبين في الأهلي الذين توجوا بالبطولات مع الشياطين الحمر، حيث قضى فترة مميزة مع النادي الأحمر، ولعب لنادي الإتحاد السكندري، ونادي الإسماعيلي، قبل أن يعتزل في عام 2011 و يتجه للعمل الإعلامي من خلال منصة برنامج الكورة والجماهير من منبر قناة الأهلي.

وإلى نص الحوار:

ما سبب تسميتك بالكابتن التاريخي للنادي الأهلي؟

سبب تسميتي بالكابتن التاريخي للأهلي، لأني أخذت أرقام و ألقاب وبطولات مع النادي الأهلي.
أنا أول لاعب معدي الـ 100 مباراة في مصر كلها، وأول لاعب معدي الـ 100 مباراة في إفريقيا مع الأهلي، بعد كده ظهر بعدي لاعبين عدوا الـ 100 مباراة.
طب يا جماعه ما أنا قبلهم بأربع سنين معدي الـ 100 مباراة، ده مش غرور أنا أحب مجهودي وتعبي بيفرق معايا جدًا، الألقاب دي وسام على صدري انت بتتعب عشان تتكرم ماتتنساش، نفسي في ده حقي النهارده بيتقال الكابتن التاريخي مش عشان لعبت اكثر عدد مباريات، لأ عشان رافع بطولات 29 بطولة، رفعت 19 كأس، رقم 19 ده كبير جدًا، هتلاقي المنافس ليا اللي معايا في النادي الأهلي رفع 6 او 7، وهتلاقي المنافس 3 او 4 رقمي كبير، فمن حقي ادلع بالألقاب أدلع بمجهودي إحنا آخر 8 سنين بلا منافس في مصر، هتقولوا فرغوا الأندية، اللي بيتقال ده إحنا ملناش دعوة بيه، إحنا ملناش منافس، ولا في مصر، ولا في إفريقيا.

لا أقلل من أحد ولكن النادي الأهلي لا أحد يقدر عليه النادي الأهلي، كان بيقع فى مجموعة ماكانوش بيناموا والله العظيم ثلاثة، الثقة في النفس، وقوة التيم والإخلاص، والرجولة، والإحساس بالمسؤولية، أنك تخسر متخلقش أعذار تروح تدور ازاي ترجع للانتصار تاني معجزة من معجزات الجيل ده، إنه ممكن يحصلو تشبع من بطولة أو اثنين أوخمسة لكن إن أنت تقاتل، وتكسب بطولات تاني وثالث ورابع إيه الجيل ده.

ما المحطة الأهم في مشوار الكابتن التاريخي للنادي الأهلي مع المارد الأحمر؟

هو حاجات كثير جدًا من خلال النادي الأهلي حصل تقصير بسببها، لكن أنا شايف إن كل بطولة لها قصتها وحدودتها، كل البطولات اللي لعبناها كل بطولة لها أهمية كبيرة عندنا، عشان أقول محطه واحده في مشوار كبير كله بطولات هظلم بطولة علي بطولة يعني أنا شايف إن المشوار كله بحلوه وبمره كان في مجهود كبير، وكان في ذكريات جميله سواء مع جمهورنا، سواء مع لاعبتنا، أو مع مجلس إدارتنا، لأ المشوار كله محطه مهمه جدًا.

ما رأيك في سياسة إدارة النادي الأهلي حاليًا؟ و رأيك في لجنة التخطيط بالنادي؟

أنا مش هقيم لجان لأن العمل هو اللي بيقيم نفسه.

النادي الأهلي فضل طول عمره شغل مؤسسة العمل الجماعي، أكيد لهم كل الإحترام والتقدير.

ولكن في نقطه فيما يخص مجلس إدارة النادي الأهلي أنا قلت وهقول تاني دورنا مش نقيم الإدارة حلو، ولا وحش مش ده دورنا، إحنا دورنا لما مجلس إدارة الأهلي يتخذ قرار كلنا ندعمه ونسانده، حتى لو أنت شايف وجهه نظرك على سبيل المثال: الناس كلها على الصفحات قامت ومقعدتش، والسوشيال ميديا قام ومقعدش على قصة فايلر والجمهور هو هو اللي رجع يشيد بالمدير الفني أنت بتشوف القصة بوجهه نظرك بمنظور، ومجلس الإدارة، كل إدارة النادي بيشوفو بشكل أكبر، وبشكل متعمق وبشكل أوسع، فمن هنا مش دورنا ندخل في قرارات فهناك بعض الأمور ممكن تضايقك، وبعض الأمور تخليك مبسوط، فأنا بشوف المبدأ العام، إن أنت لازم أي قرار يتخذه مجلس إدارة النادي الأهلي علينا إن إحنا ندعمه لأنه هو عمره ما هيشتغل أبدًا ضد مصلحة النادي.

بعض التصريحات التي اتقالت على لسانك الفترة الأخيرة ما تعليقك وتعقيبك عليها؟

التصريح الأول: قلت بكيت عند عودتي للأهلي عند لقاء الكابتن محمود الخطيب وترحيبه بك!

-مش ده اللي حصل بالضبط أنا ما قلتش كده.
أولًا أنا قلت ثلاث حاجات وبكرر تاني عشان في ناس بتقعد تحرف في الكلام، اتقال في بعض الصفحات وفي ناس كتبت بيقولوا إن أنا ندمان على إني إنتخاب محمود طاهر، أولًا الكلام ده مش صح أنا مش ندمان على إنتخاب محمود طاهر، ولكن أنا ندمان على الطريقة التي ساندته بها تاريخي و بطولاتي مع الأهلي، طريقه المساندة مكنتش تنفع خالص.
أحيانًا بيحصل غلط أنا لما رحت الدستور اللي كان يقر، أو لائحة النادي التقيت بالكابتن الخطيب بالصدفة، فالراجل رحب بيا جدًا وأخدنى فى حضنه، حاول يطمن علي وتكلم معي، فأنا لما مشيت من النادي بكيت بصراحه.

وأنا قلت مليون مرة و هفضل أقول وبمفهوم واضح، ولا يزيد حته ولا ينقص منه حته، لما مشيت من النادي كنت ماشي على كوبري أكتوبر ففكرت، وقلت الجمله دي بالضبط (أحرجني بأدبه).

يعني كان ممكن يتجاهلن، كان ممكن ميسلمش عليا، وده ماكنش هيبقى مقبول بالنسبة لي برده، متخيل لما حد يعاملك بقمة الأدب، وقمة الرقي والإحترام وبسنين العشرة اللي بينا فأخرجني بأدبه الشديد بصراحة.

أنا من حقي إنتخب اللي أنا عاوزه، لكن عشان أسمي داخل النادي، وتاريخي اللي عملته كان لازم الطريقه اللي أساند، أو أدعم بيها أي كان الأسم إيه لازم مش بالطريقه دي خالص.

التصريح الثاني: قلت تاريخي وبطولاتي مش فلوس!

-أه طبعا.. بشوف وبعرف الكلام ده، وأنا الوحيد اللى حسه لما حد يستضيفني في برنامج، ويروح عامل المقابلة، أو التقرير الأولاني كلهم بيستغربوا من عدد البطولات الكبير جدًا بيستغربوا إن في حاجات بيبقوا ناسينها بشكل كبير.

1/ النادي الأهلي أكيد أداني كل حاجه، و ساعدني في كل حاجه بتكلم عن الكيان مش بتكلم عن أفراد، كلنا خدامين النادي الاهلي.

وكلنا لولا النادي الأهلي ماكناش نبقى في المكانة في المجتمع بالشكل ده بالأمانه، واللي يقول غير كده يبقى منافق وكذاب، لأن النادي الأهلي بيساعدك في حاجات كثير جدًا سواء في قيمتك داخل المجتمع أو سلوكياتك داخل المجتمع، أو سواء الأهداف والطموح اللي بيعلي سقف طموحك مبيعملش كده غير النادي الأهلي.

2/ لما بروح بكمية البطولات دي كلها حاجه أفتخر بها وأنا قاعد (طظ في الفلوس طظ في الملايين طظ في الحسابات في البنوك) قصاد لما بتدخل وهم يستعرضون بطولاتك، وتاريخك اللي أنت حققتها بيبقوا مخضوضين كلهم كل المذيعين والمعدين، وكل اللي بيشتغل في الميديا واسألوا أي معد في ضيوف بيروحوا يدوروا لها على صوره، او يروحوا يدوروا لها على ربع بطوله عشان ينجمها.

إحنا تاريخنا بيتكلم عننا بطولاتنا، وإنجازاتنا محتاجه مجلدات حاجه فعلا أفتخر بها، أنا قولت التصريح ده، وهرجع أقوله ثاني طظ في الملايين قصاد البطولات.

لما تكسب بطولات وتحقق بطولات أسرتك و جمهورك وعيلتك والقريبين منك، بيبقوا فخورين بيك مجرد ما بيعدوا معاك، في لاعيبه أخذت نجومية، و تيجي تبص في رصيدها ما فيش بطولتين.

النجومية اللي بتسعد جمهورك بتاخذ بطولات وتحقق أهداف جمهورك هي دي النجومية، وهو ده اللي يستحق النجومية، مش النجومية الزائفة بتروباص ولا ترقيصة، إحنا الحالة العبثية احنا اللي عاملينها هنا، النجومية استمرارية في إسعاد الجماهير، النجومية استمرارية في صناعة التاريخ، النجومية استمرارية في رفع اسم وكيان ناديك وتحمل المسؤولية.

التصريح الثالث: قلت اللي ندمان على اللعب للأهلي ميشرفناش و مش عايزينه!

خليني أوضح الجزئيه دي، لأن أنا قلت كده فعلا في لاعيبه للأسف للأسف لما لقوا الدنيا في فراغ إعلامي، وقصه كورونا بقالنا أربع شهور في ناس تم تنجيمهم عشان تشتم النادي الأهلي، وللأسف في منهم لعب للنادي الأهلي، و في ناس أتنجمت ملعبتش في الأهلي، وطلعت تشتم النادي الأهلي، وتعبث في تاريخه، وفي ناس لعبت للأهلي سنه و سنتين وثلاثة بيحسسوني، وهم بيتكلموا إنهم جم حرروا الأهلي من الإنجليز ومشوا.

لأ الكلام ده مش صح لو أنت ندمان أي لاعب يصرح إنه ندمان على اللعب للأهلي لا يشرفنا كلنا كــ أهلاوية من أصغر واحد في الجمهور لغاية أكبر واحد فينا، لايشرفنا إن أنت في يوم من الأيام لبست تيشرت النادي الأهلي.

وإذا كنت لبست تيشرت الأهلي غلط فهو أضاف لك، أضاف لك بطولات، وتاريخ أنت لا يستحقها لأن من لا يعلم قيمة النادي الأهلي ( فليذهب الى الجحيم) زي مابيقولو.

التصريح الرابع: صرحت وقلت خذوا مني ملايين الدنيا وأرجع ألعب مباراة مع الأهلي!

أيوه الرسالة واضحة لكل الأجيال الموجودة في كل قطاعات الناشئين كرة القدم مش فلوس، واللي يفكر فيها كده من هوالخسران، ماأنا اهوه مريت بكل حاجه أنا بنصحك نصيحه أتمسك بالأهلي حاول تقعد بين جدرانه لغاية آخر لحظة في عمرك، وقاتل على النادي الأهلي وخليك وسط عزوتك ومجلس إدارتك ونجومك، لأن النادي الأهلي حاجه الكل يفتخر بها و رسالة لكل الناشئين، و كل حد بيلعب في كل الألعاب في الأهلي (الأهلي نعمة كبيرة بيضيف لك وأنت بتضيف له بمجهودك)، ولكن أنا عن نفسي، نفسي أرجع ألعب مباراة مع الأهلي، وأرجع أنزل ثاني ألبس تيشرت النادي الأهلي قدام الملايين ده إحساس عندي طول الوقت آه ما حسيتوش كثير بعد ما بطلت بس حسيت به فعلًا لما قلت كده، حسيت إن الواحد نفسه يلبس تيشرت الأهلي، و ينزل وسط الجمهور اللي وحشه قلت كده من إحساسي الشخصي.

التصريح الخامس : قلت اللي يقرب من الأهلي أكله بسنانى!

أه طبعا..أه طبعا.. أنا أفهم اللي ينتقدني مش شادي، اللي ينتقد الكيان يبقى مقرب مني يبقي ينافسني بدل ماتبقي زعيم أوي وتحاول تقلل كده، ولا عجبك أهلي قيم ومبادئ ولا عجبك نادي البطولات ولا عجبك نادي القرن، ولا عجبكوا أي حاجة حلوة.

بدل ما تتعلموا وتشوفوا النادي ده بينجح إزاي، وتخلق أعذار طول الوقت شوف النادي بينجح إزاي في شغلوا المؤسسي أي حد فعلًا هيتكلم على الأهلي آه هكلوا بسناني.

لأن ما بيطلعش العيب إلا من أهل العيب، المعيوب اللي ما بيشوفش النجاح، المعيوب المحروم اللي يعلق علي شماعه الفشل طول الوقت.

اللي زي دول ما تديهمش فرصه الحالة العبثية التي فيها الرياضة، والخروج عن النص والأخلاقيات، ماتدوش فرصة لناس زي دي تظهر لما يهاجموا الأهلي بيتنجموا، لأ لما يهاجموا النادي الأهلي ميتنجموش يتقطع لسانهم.

كيف ترى أزمة نادي القرن المثارة الفترة الأخيرة من نادي الزمالك ورئيسه؟

رد ضاحكًا.. لازم جمهور النادي الأهلي كله يأخذها بضحك، أنا عن نفسي واخذها إنها نكته وبضحك، خذوها بضحك يعني مش لازم كل حاجه تتقال نعمل حالة عصبية، النادي المنافس بيهزر معانا وإحنا لازم نقولهم ونثبت لهم إن هزاركم جميل ولطيف.

مش طول الوقت لازم نتخانق يعني متستكتروش على الناس إنها تهزر سيبوا الناس تهزر براحتها، بس هنا المشكله لما يصدق الهزار، وقفوه ولما الهزار يزيد عن حده أقرصوه قرصة ودن صغيره هيتراجع بسرعه، لأن للأسف فيه ناس بتسمع الكلام، وتمشي تكرره زي البغبغانات حتى لما تيجي تتناقش معهم هتلاقي النقاش مش موفق، فمتتناقش أصلًا.. خذها بضحك، واللي يعرف يعبث و يغير التاريخ يغيره.

عايزه أقول لكم على حاجه أنا بخاطب جمهور الأهلي (خوفو وخفرع ومنقرع ده ايه _ حرب 73 مصر وإسرائيل ومصر انتصرت)، في تاريخ ماينفعش العبث بها (نابليون بونابرت الحملة الفرنسية مثلًا ينفع أجي أقول نابليون بونابرت كان وحد القطرين)، إحنا هنهرج، ولكن هزار خدوها بهزار، التاريخ مكتوب، ومحفوظ ومحفور.

ما ردك على ما ظهر في الفترة الأخيرة من فيديوهات إساءة من رموز نادي الزمالك ومن رئيسه، ومن أسامه حسن مايسمى لاعب سابق للزمالك على الأهلي ورئيس للنادي الأهلي وجماهيره، وتريقة لاعب الزمالك السابق أحمد عيد عبد الملك على شهداء مذبحة بورسعيد؟

بإختصار شديد أنا أوجه كلامي في الجزئية دي اللي يخصني أنا موجهش لأحد.

1/ لما حبينا الكابتن محمود الخطيب حبناه من زمان أوي والأجيال الصغيرة يمكن متعرفش الكلام ده، كابتن الخطيب لما تحب متحبش عشان هو من أفضل لاعب في مصر، لا أتحب عشان أدبه وأخلاقه، وينطبق على لاعبين كثير الجمله دي لازم تحبب فيك الناس، الخطيب أتحب بعد لعبه، وقبل لعبه مش هتيجى دلوقتى بعد العمر ده كله هنصدق أي حاجه تتقال لي أو عليه.

2/ أنا كلمتي واضحه أنصار الخطيب بالملايين وأنا صرحت، وقلت قبل كده أنصاره بالملايين وأنا في أول الصف، رئيس الأهلي الذي اختارته الجمعية العمومية، هو من يمثلنا كلنا كـ أهلاويه مابالك بقي بحد أخلاقياته عالية، والناس كلها بتحترمه عمره ما غلط في حد.

3/ فيما يخص اللاعيبه اللي بتتكلم يعنى مثلا: لما شادي محمد يتكلم عن الأهلي ده اسمه الكابتن التاريخي اللي لعب كل الماتشات على مدار 11 سنة، لكن أنا لما يجي حد يتكلم أمثال أحمد عيد عبد الملك وهو أخ ليا عمري ما شفت منه حاجه وحشه، أنا أنصحك نصيحة لما تيجي تتكلم و تدافع دافع عن حرس الحدود مدافعش عن الزمالك لكن، ما فعله تلقى عقابه الفوري من الجمهور وأعتذر،
أنا بتكلم أن هو بيفضل طول الوقت يعمل فيديوهات ويدافع بقوة عن الزمالك. يعني أنا مثلًا كـ شادي محمد لما حضرتك تيجي تكلميني ده عشان أنا راجل ليا تاريخ داخل النادي الأهلي، سواء في قناته، أو بطولاته.

أناشايف أن أحمد عيد عبد الملك إنه يدافع عن حرس الحدود أولى من أنه تدافع عن الزمالك، ودي حاجة أنا شايفها كده بصراحه.

أما أسامة حسن عمل تاريخ أكبر في إنبي، بدل ما تدافع عن الزمالك دافع عن إنبي عشان تبقى فيها منطقية، أنت محب ومشجع ومنتمي دافع براحتك، لكن ما تخرجش عن النص تقلل من الناس في أسلوب ممكن يترد عليك رد صعب اوي مش حابب أدخل في لعبه مش بتاعتي، ولكن أنا عارف أنا بقول إيه كويس أوي دافع وأحب أوكيه، لكن تقعد تتكلم عن تاريخ، لأ أتكلم عن حرس الحدود وأنت تتكلم عن إنبي يعني أتكلم عن عدد مبارياتك في إنبي، وأنت عن حرس الحدود ممكن تدافع عن ده، أنا بقول هيكون حتى دمها لطيف يعني، ما تبقاش لعبت عدد أيام تتعدى على اليد في نادي، حتى لو أنت تنتمي لي و تيجي تعمل مقاتل، وتنصب نفسك ملك من الملوك عشان كلمه تريند تريند إيه وزفت إيه اللي خلانا نشوف حاجات بصراحه تجنن العقل.

الجماهير ترجع المدرج بس، و كل العبث ده هيروح والله أنا عارف بقول إيه كويس جدًا.

كيف ترى موقف قائدي الأهلي كابتن شريف إكرامي كابتن أحمد فتحي وأخيرًا كابتن حسام عاشور مع النادي الأهلي؟

كل واحد ليه قراره مقدرش أتدخل في قرار حد، هما حورين، شريف عايز أكيد يروح يلعب مش هنقعد نتحول لموظف روح، وألعب يمكن فرص اللعب هتبقى أكثر في نادي ثاني، وسنك يسمحلك في خلاص النهارده السن لما تكبر بتبقى أفكارك مختلفة، هتبقى فرصتك مختلفة كل واحد حر فأنا مش هقعد أهاجم ده عشان مشى.

لكن أنا بطلب من جمهور النادي الأهلي شفت واحد عامل فيديو لـ حسام عاشور حتى لو حسام أخطب، حتى لو حسام أخذ قرار متسرع، حتى لو عمل فيديوهات وهو ما لوش في السوشيال ميديا.

شفت واحد بيهاجم عاشور بيقول الولد ده اللي اسمه حسام عاشور اسمه “مطراوي” أنا بقوله كـ شادي محمد إحترم نفسك و بقوله اللي زيك، والأشكال اللي لا مؤاخذة في الشكل بظرف بيحرك، وظرف يجيبك، وأنت بتتكلم عن عاشور تتكلم بأدب ده ما أسمهوش الولد ده، إزاي ناس أكلتك في بوقك، وعملت شعبيه من وراء الأهلي بالكذب عشان تبانو في الآخر، دي شعبية لا تستحقها أنت، وغيرك لما تيجي تتكلم على لاعب أخلص للنادي الأهلي، حتى لو الجمهور زعلان منه أتكلم بأدب، اسمه الكابتن حسام عاشور ما أسمهوش الولا حسام عاشور يا قليل الادب.

أنا بدعو جمهور النادي الأهلي كل الناس دي اضربوا بيد من حديد عليها، عشان بيضحكوا عليكم، وبيعملوا فلوس من وراكم بقوتك لما تدخلوا تتابعهم.

دي نصيحه من أخ لكم وكبير لكل جمهور النادي الأهلي، كلنا إحنا في مواقف تزعل، ولكن إحنا اللي كنا بنقول على عاشور محترم، ومخلص والمسمار اللي عمره ما عمل مشكله والحياة فيها لازم تغلط عشان تعرف غلطك لكن مش لازم أقصو عليه وأموته وأجي عليه، لازم كل واحد تعب بتيشرت الأهلي، ومين أخلص زي حسام عاشور، ازاي أسمح لواحد زي ده ما يسواش في عالم الرياضة، والله العظيم الناس دى متعرفش غير النادي الأهلي بيلبس إيه غير لون أحمر، ولا تعرف تاريخه ولاتعرف إلا إن جيوبها بتتملى بالأظرف بدون شرف و بدون ضمير، أنا شفت الفيديو من حوالي أسبوع و كنت مستاء جدًا، ما هو لما يقول الوالا حسام عاشور هيقول كده عليا، هيقول كده على غيري ويقول كده على صفحة، ويحاول يبتز ده ويبتز ده، ومن كذا واحد الأيام دي كده بيعمل فيديو زي كده يقعد يدافع ويقاتل عن الأهلي عشان شويه جماعه تدخلوا و تدعموا (الله ينور على أكبر يا محرر سيناء يا اللي رجعتلنا طابا) لغايه لما يضحك عليهم، ويبتدي يروح للناس يبتزها وأنتم عارفين راح لمين، وقابل مين وأخذ من مين فلوس، ويعملوا قصص وهمية أنهم اتخطفوا واضربوا والكلام ده كذب بيروحوا بإرادتهم، ويقفشوا بإرادتهم، ويرجعوا تاني عارفين إن الخطيب ده اللي الجمهور بيقعوا فيه.

كابتن الخطيب محبوب من كل جماهير النادي الأهلي وراه مقاتلين بيحبوه، ولا لجان ولا قلة الأدب اللي بنسمعها في الأيام دي وشتائم، ويقعد ساعتين يعمل فيديو واحد يروحوا راجعين ثاني، ولا كأنه عمل أى حاجه يرجعوا يقولوا (الله اكبر يا مناضل)
يا جماعه يا جماعه الخير غلط يا صفحات الأهلي المحترمه غلط.

مين خليفة شادي محمد في الأهلي؟

في ناس بحب لعبها مفيش حاجه أسمها خليفة، لكن رامي ربيعه ابن من أبناء النادي الأهلي، ربنا يبعد عنه الإصابات أنا بحب ستايل لعبه لأنه يمتاز بسرعة أنا كنت بمتاز في ده، ربنا بس يبعد عنه الإصابات.

إيه أكتر تصريح ندمت عليه بعد ما قلته وأنت كلاعب أو مذيع ولو عاد الزمن لا تفعله؟

أنا مندمتش على حاجه أنا قولتها، أنا لما بصرح بحاجة بكون مقتنع بيها، وطالما مقتنع بها بقولها، ولو مش مقتنع بيها مكنتش قولتها.

ما هي أصعب لحظة عشتها؟

وأنت بتعيش الحياه مفيش حاجه أسمها لحظة واحدة أنا عندي لحظات.

1/ وفاة والدي الله يرحمه.

2/ وفاة محمد عبد الوهاب الله يرحمه لحظه صعبه جدًا جدًا لما زميلك بيموت جنبك وأنت شايفه صعب أوي أوي.

3/ مرارة كرة القدم بعد اللي حصل في بورسعيد لحظة شهداء الأهلي لحظه صعبه جدًا موت العدد ده كله في مباراة كورة.

4/ من المواقف الصعبه اللي مريت بها واتعاملت معاها، وأثرت فيا جامد وكانت مضايقاني فيديوهات مفبركة طلعت لي إن أنا بهاجم كابتن محمود الخطيب وتسوق لها تسويق جامد، لكن لما تركزوا فيها هتلاقوني ولا بهاجم، ولا جبت سيرة كابتن محمود الخطيب وكنت لما بسمعها كنت ببقى متضايق جدًا أنا مبعملش كده، ومش هاعمل كده.

ما سبب اختفائك عن الميديا؟

1/ بصراحه كان عندي شوية مشاكل شخصية كنت بتابع من بعيد لبعيد.

2/ قلة الأدب اللي موجوده مجال كرة القدم مفيش كوره أساسًا شايف خروج عن النص و قلة أدب، فأنا بمجرد أنك تدخل فهتكون مشارك حتى لو أنت مش هتتكلم، هتتعرض كل شوية من ناس من وجهة نظري، أنا أسف ناس ملهمش قيمه هيدخلوك في اللعبة، فأنت هيتحرق دمك بقى عشان خاطر مشكلة أو مشكلتين.

بإختصار الطريق ( الصمت فعلا لغه العظماء مع بعض اللي مهما عمل فهو مش هتأثر في حاجة هيستمر على نفس النهج) وهم كثر يعني.

ما رأيك في هيكلة وتجديد قناة الأهلي؟ و ما رسالتك لجماهير الأهلي علي السوشيال ميديا التي تطالب بعودتك لقناة الأهلي من منبر برنامج “الكورة والجماهير؟

أحترم ده جدًا وأشكر كل اللي كتبوا حاجه زي كده، إحنا كلنا في ناس بتقول الكلام ده وبتكون هجاصه جدًا، وتيجي تقول لها ننزل على أرض الواقع ما تلاقيهمش، تقول لها أنا راجل عاشق للنادي الأهلي.

النادي الأهلي بعتبره طوال الوقت بالنسبة لي أحسن حاجه في حياتي حتى لو عملت أكثر لكن الوقت اللي كنت فيه داخل الأهلي سواء مذيع، أو لاعب كرة فالتعامل المباشر داخل النادي، فكلنا خدامين النادي الأهلي أنا بلاش اتكلم عن حد أنا هتكلم عن نفسي أنا خدام النادي الأهلي في أي حاجه، لو أطلبت في أي حاجه اقسم بالله، وبدون مقابل ولا عندي أدنى مشكله كفايه، وشرف إن أنت أسمك يرتبط بـ الكيان الكبير صاحب التاريخ والبطولات والإنجازات، إحنا شفنا السفراء بتتعامل معانا ازاي برة، وشوفنا استقبلنا في أفريقيا و في الوطن العربي.

النادي الأهلي بيكبرك عمره ما يقلل منك ده كفايه إن أسمك مرتبط به إني أكون موجود في قناة النادي الأهلي.

بالنسبه لي ما بفكرش في الموضوع ده لما بدافع، أو أشوف النادي الأهلي محتاج أولاده يدافعوا، ويقولوا كلمة حق أعمل ده من غير مايطلب منى بدون التفكير في مناصب.

أنا بشوف من أخلاقيات أولاد النادي الأهلي إن أنت تشترك، وتكون في منصب وأنت برة راجل جدع تعرف تدافع عن النادي الأهلي، لكن أنا مبحبش حاجة واحدة في أسماء مطروحة أنا بحب الجميع واحترامي للجميع، لكن ما مفيش حد لسه يتعين، ولسه مفيش حد تعب وشقي ليه عشان يكبر أسمك، لما تيجي أسماء مطروحة على قناه الأهلي متجبليش واحد بيضحك على السوشيال ميديا، ما تجيبش حد لسه مبتدئ حياته متجبليش واحد ما يعرفش تاريخ النادي الأهلي يطلع على الشاشه مش هيبقى عارف حاجه، وتدخلهم في مربع كل هؤلاء يستحقون الانضمام لقناة الأهلي، بالنسبه لي ده غير مقبول لأن في الأول وفي الآخر، هيبقى عندك سيشن أكبر أنك لعبت في الأهلي كابتن للأهلي زي أي كابتن له اسمه وله تاريخه، وله بطولات ما يحبش الوضعيه دي.

أنا بتكلم كلام منطقي وطبيعي، أنا ممكن أقول أتكلم عن نفسي بقى أنا بقول الحقيقة مثلا: أبوتريكه ومحمد بركات مينفعش اجى النهارده مثلًا: أروح أجيب لاعب بقالو شهرين يلعب في الأهلي أقولك شايف هو ده اللي أجمد من أبو تريكة، أو أجمد من بركات، أو أحطهوملك في مقارنة مينفعش يتحط في مقارنة، هيا هيا نفس الفكرة في الإعلام لما يجي واحد يشتغل 8 سنين في القناة، وسنتين شايل عشان نلم كل حاجه ونكرم أولاده، وندافع عن النادي الأهلي أمام كل متطاول قعدنا سنتين عشان ناس عايزه تقفل القناة.

و شركه أستادات ناس محترمه جدًا ولكن ما ينفعش النهارده تيجى تتعاقد مع واحد لسه طالع على التلفزيون، أو رئيس تحرير لبرنامج عشان تشد جمهور غير مقبول لأنه مش في دماغ الجمهور أساسًا.

الأهلي لو احتاجني مش محتاج أساسًا حد يكلمني.

لكن أكيد أكيد بشكر كل الصفحات المحترمة أشكر صفحة “نادي الوطنية”، وصفحة “الأهلي اليوم”، وصفحات كثير كان نفسي أقولهم كلهم.

وبشكر أي شاب صغير او كبير، او أي سيده او بنت محترمه كتبت، وحبت إن شادي يكون موجود في القناة انا بشكرهم شكرًا جزيلًا.

احنا أولاد النادي الأهلي اللي بنحبه ودي عزوتنا، احنا كلنا إذا كنا في القناة نقاتل عليه، وإذا كنا بره هدافع ونحافظ عليه، صدقوني أنا بتكلم كلام من القلب.

في ظل تكرار الإصابات بكورونا داخل الفرق ما رؤيتك حول استكمال النشاط الموسم الحالي، وأخرها إصابات لاعبي المصري ؟ وهل في حالة إلغائه هيتم تتويج الأهلي بطل الموسم الحالي؟

تمنياتى بالشفاء العاجل للاعبي المصري وكل اللاعبين المصابين

قلت قبل كده الموضوع  كل واحد يعرف واجباته إيه وحقوقه إيه، ونحمي أي حد من هذا الفيروس اللعين، لكن لو هنقدر نحمي الناس نكمل مسابقتنا، بعيدًا بقى عن الهري اللي بيحصل، مش فكرة بطل بقى ونفضل نتخانق على البطل لأن البطل معروف هو مين هو الأهلي.

عايزين نفكر كـ أهلاويه إحنا أكبر من إننا ندخل في نقاشات وصراعات.

هو الأهلي مستني بطولة، بطولة الدوري دي بطولة لازم أخذها عشان أكون في إفريقيا، عايزين تاخدوا الدوري خدوه هديه بس محدش يتصاب محدش يحصله حاجه، مبروك عليكم يا عم إحنا شبعانين بطولات دوري.

من وجهة نظرك مين بطل دوري أبطال إفريقيا في ظل وجود أربع أكبر فرق في إفريقيا فرقتين من مصر (الأهلي والزمالك) وفرقتين من المغرب (الرجاء والوداد)؟

بتسألي الكابتن التاريخي للأهلي السؤال ده.

طالما أسم النادي الأهلي متواجد، أرشحه و بشده.