على عقدة في حوار خاص للمحايد: بتمنى تألق “جرافيستا”

على عقدة في حوار خاص للمحايد: بتمنى تألق “جرافيستا”

على عقدة الشهير بجرافيستا شاب منحه القدر موهبة الرسم منذ صغره ، ومع مرور الوقت تمكن من تحويلها من مجرد هواية عادية كما توجد عند البعض مننا إلى مصدر رزق دفعه إلى تكوين عمل جماعي يحلم بتألقه في العالم أجمع ، وقد نجد أنه قد كشفت لنا أبرز التصريحات حول حياته وهوايته من خلال حواره مع جريدة المحايد الإخباري. 

1/ عرفنا بنفسك ؟

 

” أنا علي عقدة شهرتي “جرافيستا“، عندي 27 سنة، من طنطا ” .

 

2/متى بدأ إكتشاف موهبة الرسم لديك ؟

 

” بدايتي للرسم كانت من طفولتي الموهبة كانت موجودة بس مفيش إهتمام بيها، بدأت أهتم من سن ال20 تقريباً في الوقت ده كان كل هدفي إني أتميز في مجالي أكتر من إني أكون شاطر ف كل أنواع الرسم” .

 

3/كلمنا عن أول رسمة عملتها وأزاي قدرت تطور مستواك للمستوى الاحترافي اللي انت عليه حالياً؟

 

” متذكر إن أول رسمة بدأت بيها كانت لكرستيانو رونالدو، لأني كنت بحبه جداً جداً وقتها، ولما رسمته وريت الرسمة لأصحابي في اللي شجع وفي اللي ضحك عليها هي بصراحة كانت مضحكة شوية علشان كنت لسه في بداية تعلمي.

كانت بدايتي في رسم البورتريه

من وقتها وأنا حاولت أتعلم واكتسب خبرة أكبر فبدأت أتابع فنانين على الفيس بوك منهم شباب ومنهم فنانين كبار كنت بستنا أشوف أعمال جديدة ليهم وأشوف نجاحهم وكأني أنا اللي بنجح كل ما كنت بشوف آراء ايجابية بخصوص الفنانين كنت بتشجع وبسعي أكتر إني أتعلم بسرعة وفي ظل الوقت ده كنت برسم كل يوم أكتر من رسمة بس مكنتش بعرضها بصراحة ف الاول، بعد كده لما حسيت أن مستوايا اتطور شوية بدأت أعرض رسمي علي الفيسبوك زيي زي الفنانين اللي كنت بتابعهم ، معظم الناس ف الأول كانت بتضحك طبعاً لأنهم أول مرة يشوفوا مستوايا بس اللي حفزني إني حاسس بتطور فكملت وكنت بنزل كل يوم رسمة والحمد لله الناس بدأت تحس بالتطور وبدأوا يشجعوني ، وبصراحة لما كنت بشوف مستوي الفنانين اللي أنا متابعهم كنت بقول ولا 50 سنة علي ما أوصل للمستوي ده وأكون مشهور وسطهم فرجعت أفكر في نقطة التميز ، مش كفاية الاستمرارية علي نفس نوع الرسم اللي هو البورتريه الرصاص أو الفحم ، فبدأت أرسم بوب آرت ودي كانت النقلة اللي حببتني ف الرسم أكتر مش بس لا وكمان بعد كدا بدأت أعمل فيديوهات وأنا برسم وكنت بختصر الفيديو على 3 دقايق تقريباً وأنزله، كنت بلاقي إنبهار من الناس كان بيدفعني أكمل وكنت كل مرة أعمل فيديو بطريقة وشو مختلف عن اللي قبله ، بدأت أرسم افيش مسلسلات علي ميوزك التتر بشو لذيذ كان بيعجب الناس بدأت بكلبش 2 للفنان أمير كرارة وده قابل إعجاب شديد من الناس لدرجة إن في فنانين منشنو للفنان شخصياً ، وقتها اتفاجئت تاني يوم والفنان باعتلي أدد و مسدج إنه عاوز الرسمة لو أمكن و بالفعل وصلتلو الرسمة واستقبلني أحسن إستقبال بصراحة ، يليها كتير من الفنانين منهم الفنان مصطفي شعبان الفنان محمد رمضان ‘ الرابر الچوكر  ‘ الفنان أحمد داود والحمد لله الفنانين عجبهم شغلي “.

 

4/هل بتتعامل مع الرسم كهواية وموهبة بتحبها، ولا بتتعامل معاه كشغل ؟

 

” أنا في الأول الرسم كان بالنسبالي كهواية وحاجة بحبها فبمارسها عادي بس بعد لما بدأت أحس إن كل وقتي رايح للرسم فقولت ليه لا مايبقاش شغلي ف المجال اللي أنا بحبه وعلي يقين إني طول ما أنا بحب المجال اللي شغال فيه فمفيش حاجة أسمها سقف طموح في وتقدر تعمل كل حاجة متوقفش عن التطور طول ما أنت مستمر وعلى يقين دائم بإن مواصلة السعي تقتضدي حتمية الوصول، حالياً الرسم أصبح كل حاجة في حياتي “.

 

5/ ممكن تكلمنا عن أول تجربة حولت الرسم لدخل مادي وشغل لك بعد ماكان هواية وقت الفراغ أو الملل ؟

 

” في مرة انطلب مني أرسم علي حيطة في كافية في إسكندرية ، بصراحة اتخضيت ورفضت وقلت لصاحب الكافية أنا مش متمكن كفاية إنك تسلمني ديكور كافية، صاحب الكافيه مشكوراً قالي والله لو عملت أي أنا متقبله وواثق فيك حسيت إن ربنا باعتهولي بصراحة إني ابتدي استايل أو نوع جديد مكنش على بالي أصلاً وهو الرسم الجرافيتي ، فقولت للراجل اديني 3 أيام وهرد عليك ، الراجل مشكوراً استناني فضيت أوضتي كلها و جهزت أدوات وخامات الجرافيتي وبدأت اعك وابوظ لحد ما وصلت لنتيجة مرضية في النهاية الحمد لله، فكلمت صاحب الكافية وعملتلو الشغل وانبسط جداً من النتيجة ، و بدأت أعلن بعدها إني ممكن أطلع شغل جرافيتي وحطيت صور الكافية كعرض للمستوى “.

دي أول تجربة ليا كرسم على الحيطة

 

ده شغلي حالياً

 

6/ ماهي طبيعة رسوماتك، بتفضل أي نوع من أنواع الرسم المنتشرة الفترة الحالية؟

 

” أنا قعدت فترة فضلت اتنقل بين 3 استايلات للرسم وهم البوب آرت والجرافيتي والبورترية و حسيت إني لازم أهتم باستايل واحد واحط في كل طاقتي واتميز فيه جامد فاختارت الجرافيتي، و قررت اكون فريق يساعدني في شغلي لأن بصراحة لواحدي عمري ما أقدر أحقق كل اللي في دماغي فعرضت الفكرة على القريبين مني اللي هم محمود مرعي وباسم مرعي و محمد شهاب دول أصحابي اللي وافقو يساعدوني ويبقوا معايا في الفريق واختارنا للفريق أسم “جرافيستا” واخدنا شقة شريكي محمود عشان نعملها مرسم ومقر لينا ومن يومها و أحنا الحمد لله كل يوم في تطور واضح في المستوي ولسه إن شاء الله اللي جاي تقيل جداً “.

 

7/ بتتمني أي الفترة المقبلة؟

 

” بتمنى إن إسم الفريق بتاعنا “جرافيستا” يبقي أشهر فريق رسم في العالم وإن شاء الله الفترة الجاية هنقدم رسومات وفيديوهات برسالة وفكرة هادفة تعجب الناس وتفيدهم “.