حوار : باسم السحيمي
انتقل من عالم السوشيال ميديا سريعاً للسينما ثم للدراما و حقق نجاح باهر في الثلاثة مجالات .. يسير علي خطي ثابتة سريعة و يحقق انجازات في عالم الفن غير متوقعة ليصبح مؤخراً الفنان (عمرو وهبة) أحد النجوم الشابة علي الساحة الفنية .
أجرى “المحايد اللإخباري” حواراً معه حول بدايته و أهم الخطوات التي اتخذها في طريقه الفني القصير المليء بالنجاحات.
1- خلينا نرجع ورا شوية و نبدأ من أبو حفيظة .. كلمنا عن تجربتك مع أكرم حسني وازاي جت بدايتك هناك وفادتك قد ايه ؟
بدايتي مع أكرم كانت عبارة اني واحد بيكتب بوستات عالفيس بوك وبهزر مع الناس حتي قبل ماعمل فيديوهات كانت بوستات كتابة بس و كان أكرم بيجمع ورشة كتابة فبعتلي قالي عاوزك معانا نجرب سوا كده حتي الوقت ده كنت انا لسة ماجيتش القاهرة و اشتغلت معاهم بالميل .. و بعدها بدأت أكتب في أبلة فاهيتا شوية وفي بدايات برنامج البلاتوه مع أحمد أمين .
2- برنامج نجوم بتحب مصر و الموظف المثالي كنت متوقعلهم النجاح الباهر ده كله وانهم يكونوا مدخل مشرف ليك للسينما والدراما ؟
لأ ماكنتش متوقع خالص بصراحة النجاح ولا انهم ياخدوني سكة التمثيل بصراحة خالص .. يعني هي بالصدفة كانت أرقام المشاهدات عادية بس اللي شافها الناس في الوسط وده كان نصيب فعلا ماكنش متخططله خالص .
3- مين رشحك لدور دكتور لطيف في الكويسين و جهزتله ازاي ؟
رشحني أحمد فهمي كان بيعمل الفيلم وعاوز كاست فيه أدوار مش كبيرة ومش رئيسية و حد ينفع يعمله فماكنش ينفع ييجي فيه نجم لانه دور مش كبير وكان عارف اني بكتب فكان عارف اني هطور من الدور وده الحمد لله اللي حصل واستفدت جدا .
4- الكتابة بالنسبالك أمتع ولا التمثيل ؟
التمثيل بالنسبالي أمتع بس الأمتع من الاتنين التمثيل اللي بكتبه يعني بحب أي دور يجيلي أكتبه من الاول وأروح للمخرج والمؤلف وأغير في حاجات وأعمل لزمات .. ده بالنسبالي أحلي حاجة بصراحة .
5- كلمنا عن تجربتك في فيلم ماكو ؟
ماكو فيلم مختلف شوية عشان كل فيه حاجة مختلفة .. الدور مش هزار .. مش أكشن بس ساسبينس وتحضيره مختلف من غطس و سفر وبحر و بهدلة.. هو تجربة ممتعة و متعبة جداً جداً يارب ربنا يجعل التعب بفايدة و يجعل تعبنا سبب في إن الفيلم ينجح باذن الله
6- ايه أعمالك الجاية باذن الله ؟
القريب اللي خلص اللي هو فيلم ماكو بس مستنيين حسب ظروف الكورونا باذن الله عشان السينمات لسة مفيش إقبال عليها عشان المرض
وفيه مسلسل خلص من أيام كان بقالنا خمس شهور بنشتغل فيه كتابة وتمثيل .. و كان المفروض ينزل الشهر ده بس اتأجل يمكن لأول السنة .. معايا شيماء سيف و ليلي أحمد زاهر وهشام جمال المنتج هيمثل معانا .. هو انتاج شركة سنيرجي و هشام جمال مع بعض .. و ده حاجة مطرقعة ومختلفة خالص .. المسلسل بالجرافيكس والكتابة أعتقد حاجة جديدة .. مابحبش أتكلم كويس عن عمل أنا فيه بس أعتقد عوامل النجاح متوفرة .. البادجيت كبير و الممثلين كويسين والورق ظريف .. يعني ربنا يكرمنا باذن الله .
7- بشكل عام الممثل ليه بيكون متهم من قبل الجمهور بينما هو يمثل دور واقعى لحال المجتمع ؟
والله الممثل مش متهم اوي .. هو التمثيل شغلانة عامة فالممثل لازم يرتضي زي لعيب الكورة لما يجيد يمدح ولما يقع الناس هتنتقده .
يعني لو تخيلت إن الناس هتفضل تطبلك طول الوقت مش هتنجح و فيه ناس مابتمثلش الدور الواقعي اوي مش شرط خالص بس هو الجمهور صعب و ارضائه صعب بس هي دي الشغلانة ً
8-ايه رأيك في الصورة اللي انتشرت للفنان محمد رمضان ؟ و هل مقتنع بايقافه عن العمل ولا شايف ان ده كان رد فعل قاسي ؟
بص انا مابعرفش اتكلم عن حد بس محمد ؤمضان مؤخرا كان ليه حاجات كتير أوي بالنسبة للجمهور مستفزة فالموضوع تراكمي مش موضوع الصورة بس .. ومع إحترامي لتفكيره ومع إحترامي لأي دولة بتعمل أي حاجة تبقي اسرائيل العدو الاول لمصر طول العمر والسلام حاجة والمعاهدات والورق حاجة واللي في النفوس من ناحيتهم حاجة ومن ناحيتنا حاجة فلا يمكن نصفي .. والسياسة ملناش دعوة بيهاو.
فماتبقاش مستفز للناس وترجع تقول جمهوري مش في ضهري .. الموضوع ملهوش علاقة بالجمهور .. الناس بتحبك وانت ممثل شاطر وكل حاجة بس أنا من رأيي الموضوع ماكنش ليه لازمة لو هو كان عارف .