محمد جابر شاب العشرين عاماً يحب الفن بأنواعه منذ صغره، و يحلم بتطوير مستواه الفني أكثر فأكثر ،وقد كشف لنا في حواره مع جريدة المحايد الإخباري أبرز التصريحات حول حياته وهوايته لنتعرف عليه بصورة أوضح.
1/ ممكن تعريف مختصر عن حضرتك؟
” محمد جابر عرفة من محافظة بني سويف، أبلغ من العمر 20 عاماً، بدرس في كلية تجارة إنجليزي جامعة بني سويف”.
2/ متى وكيف كانت بدايتك الفنية؟
” بدأت اكتشف حبي للرسم وأنا في سنة أولى إعدادي، ومدرس الرسم بتاعي هو السبب في إكتشافي لحبي للرسم بعد لما لقاني بهتم بالحصة بتاعته على عكس باقي الطلاب اللي كانت بتهمل حصة الرسم وأحنا في السن ده، فإهتمامي ده خلي حضرته يركز معايا اوي في الرسومات اللي كنت برسمها و بدأ إنه يصححلي الأخطاء اللي كانت بتبقى موجودة عندي وكمان بدأ يعلمني أساسيات الرسم اللي المفروض أكون عارفها في الفترة دي علشان يبقى رسمي أحسن مما كان عليه بما إن عندي شغف جوايا إني اهتم بالمجال الفني “.
3/ إزاى بدأت تنمي الموهبة عندك؟
” في فترة الإعدادية كنت عادي خالص اللي هو بهتم باللي مطلوب في حصص الرسم وبس، بس بعد لما دخلت المرحلة الثانوية قررت إني اطور من نفسي شوية عن المستوى العادي اللي كنت فيه، وبالفعل بدأت اهتم واطور من نفسي في المجال ده واحضر كورسات واتعلم كذا نوع تاني من الرسم غير الرسم العادي اللي بناخده في المدارس الحكومية المصرية، و بعد متابعة مع نفسي ومع شوية كورسات كنت بحضرهم لاحظت تطور كويس أوي في مستوايا لدرجة إني اتمكنت من الرسم على الحيطان، وكمان يجي نص حيطان المدرسة الثانوية اللي كنت فيها رسمي، اينعم كنت بتهرب من الحصص بإني اعمل رسمة ع الحيطة بس كنت بكون مبسوط أوي بجد وأنا برسم وبلون على الحيطان “.
4/ من المعروف إن للرسم أنواع كتيرة ومختلفة عن بعضها، فأي نوع أنت بتفضله؟
” أنا بحب كل أنواع الرسم لأن كل نوع بيجذنبي بطريقته، بس أنا ك محمد جابر بفضل أو بحب ارسم فحم ومنديلا سواء ورق أو علي الحيطان، دول هم اكتر نوعين متمكن فيهم وباقي الخامات أغلبها بعرف أتعامل معاها بس مش تمكن أوي، وحاليا أنا بقيت بدمج بين المجال الفني والشغل بحيث إني بقيت مهتم بشغل الهاند ميد والليزر شوية “.
5/ ماهي أمنياتك بخصوص المجال ده؟
” من وأنا في الثانوية العامة وأنا كنت بتمنى أدخل كلية فنون تطبيقية، وبالفعل بعد امتحانات الثانوية العامة قدمت على إمتحان القدرات لكلية الفنون التطبيقية ونجحت في إمتحان القدرات، بس للأسف التنسيق دخلني كلية تجارة إنجليزي، ويمكن ده سبب فإني أهمل شوية في الجانب الفني، فبتمني إني أقدر اطور من مستوايا الفترة الجاية وأكون سبب في تطور الناس اللي حواليا في المجال الفني بإني أساعدهم علي قد ما أقدر في إنهم يستمروا في ممارسة الشيء اللي بيحبوه “.
