محمد صلاح شاب منحه الله موهبة الرسم منذ طفولته ، مثلما قد يمنح الله أحدنا موهبة ذاتية لا تحتاج لدراسة لتعلمها، وتضعنا على بداية طريق تحقيق الحلم، فالموهبة التي نكتشفها في أنفسنا في السنوات الأولى من عمرنا لم تخلق عن طريق الصدفة، ولكنها ربما تكون لسبب وهدف نعيش عمرنا كله لتحقيقه،وذلك الذي دفع محمد صلاح للتمسك بممارسة موهبته التي منحها القدر أياها.
1/ ممكن تعريف مختصر عنك؟
أسمى محمد صلاح، سني 22 سنة، ساكن في مركز تمي الامديد التابع لمحافظة الدقهلية، بدرس في كلية الطب البشري جامعة المنصورة .
2/ متى بدأت الرسم، وكيف كانت بدايتك؟
“منذ طفولتي وأنا بحب الرسم ، واللي كان السبب في حبي للمجال ده هو والدي، ولحد الآن متذكر شغفي لما كنت بجري عليه بالكراسة والقلم وأقوله أنا عايز أشوفك وانت بترسم يا بابا ، في المرحلة دي كنت بدأت ألقت واتعلم منه حاجات كتير في الرسم لحد مابدأت الهواية تزداد وتزدهر عندي في المرحلة الإعدادية والثانوية، بس بدأت أنميها بشكل ملحوظ واهتم بيها لما دخلت الجامعة و كان ده من خلال متابعتي لكورسات تعلم الرسم علي اليوتيوب “.
3/ هل قام الأهل والأصدقاء بتشجيعك فى بادئ الأمر؟
” والدي شجعني كتير من لما كنت صغير وهو أكتر واحد كان بيجيبلي أدوات رسم كهدية وكان بيلبي ليا أي متطلبات بطلبها منه، وبعد لما دخلت الجامعة بدأت أشارك في مسابقات كتير خاصة بالمجال الفني في الكلية بدأت ألاقي اهتمام كبير من كل اللي حواليا من أهل في البيت وأصحاب في الدراسة وأصحاب في الحياة العامة “.
4/ للرسم أنواع كتيرة، أي نوع أنت بتفضله؟
” أنا بفضل كل أنواع الرسم علشان مقدرش أميز بين نوع عن نوع تاني غيره، بس اللي أنا بمارسه حالياً رسم البورتريهات بالرصاص و الفحم و كمان بالجاف، و برسم ثلاثي أبعاد 3D، و رسم طبي 3D و بحاول أرسم رسومات تشريحية “.
5/ ما أكثر لوحاتك التي حققت نجاحاً؟
“من أفضل رسوماتي اللي رسمتها كانت كاريكاتير عن كورونا و رسمة جمعت فيها طبيب الغلابة ربنا يرحمه و دكتور مجدي يعقوب لأنهم قدوة لأي طالب طب و كمان قدوة لأي حد فاعل خير و كمان في رسمة رسمتها بالجاف للشيخ الشعراوي“.
6/ ما هي أمنيتك ؟
” بتمنى إني أفضل مستمر في المجال الفني ده وإني كل فترة قدراتي تطور أكتر من الفترة اللي قبلها ، وبتمني مبطلش رسم لما اتخرج وأبقى دكتور، و من أهم أمنياتي إني أعلم الرسم لكتير من الناس اللي بتحبه، و أكون طبيب رسام مشهور و أتمكن من عمل معرض فني ليا”.