موهبة العاب قوى سوهاجية ل “المحايد الإخباري”: بنت الصعيد دائما قوية.. وعائلتي تدعمني

موهبة العاب قوى سوهاجية ل “المحايد الإخباري”: بنت الصعيد دائما قوية.. وعائلتي تدعمني

حوار: نورا محمد  

لاعبة ومدربة جمباز نشأت وتربت في صعيد مصر بمحافظة سوهاج، شاركت ف العديد من الأنشطة الرياضيه والثقافية والتنمية البشرية والمعسكرات والندوات المختلفه لحقوق الإنسان وورش العمل .. إلى نص الحوار

 

قبل أي شئ .. حدثينا عن نفسك

أنا ايمان صابر رجب عبدالعال، الفرقه الثانية كلية التربية الرياضية جامعة سوهاج من مركز طهطا.

احكي لنا عن انجازاتك

نائب مسئول أسرة طلاب من أجل مصر، ومنسق مساعد الشباب والرياضة، حاصلة على الطالبه المثاليه مركز تانى ع مستوى كلية التربية الرياضية، حاصلة على إفادة من الاتحاد المصري للوشو كونغ فو، حصلت على 2 كارانيه من الاتحاد.

بالإضافة لذلك حاصلة مركز اول بطولة تنين عرب علي  مستوى المحافظة حاصلة ع مركز. اول ف اليوم الرياضي من كلية التربية الرياضية .

حاصلة على مركز اول جمباز ف مسابقة بالعاشر من رمضان حاصلة على شهادة تميز ف مبادرة تطوير حى راشد حاصلة على شهادة ف الدورة التدريبية الثانيه .

فى اعداد القاده حاصلة على شهادة تقدير نتيجة للمشاركة ف فعاليات ملتقي الشباب السنوى بشرم الشيخ.

وحاصلة على درجة امتياز فى الكيج بوكسنج حاصلة ع العديد من الدورات ف الورش المهنيه حاصلة ع شهادة ف الكروس فيت ع مستوى الجامعات حاصلة ع اتنين ميداليا ف الكونغ فو حاصلة على دورة الإسعافات الأولية وإصابات الملاعب.

حاصلة على مركز تانى ف بطولة النديه للكونغ فو حاصلة ع شهادة ف المشاركة المتميزة ف فن الكونغ فو والالعاب القتاليه والدفاع عن النفس حاصلة على شهادة كونغ فو ساندا والفنون القتالية.

كيف بدأ مشوارك الرياضي؟

كنت فى اولي ثانوى بلعب كونغ فو لحد تالته ثانوى بعد كده كنت بعمل حركه بالصدفه منها عرفت أن عندى مرونه بعد كده.

بدأت ف الجمباز بعد كده كنت رايحه اقدم ع تربيه رياضيه ف شافوني ف الاختبارات.

وانابلعب جمباز فااختاروني امرن ف النادى الصيفي بتاع الكليه وبعدها بدأت اشتغل ع نفسي اكتر ولسه مكمله بااذن الله بس وبعدها بقيت بنزل امرن ف اكاديميات.

بنت الصعيد أضعف من النجاح بطبيعة العادات التي تفرض عليها الخضوع .. كيف تغلبتي على هذا المنطق؟

بنت الصعيد دايما قويه مهما كانت وسط مجتمع منغلق حبتين لكنها تمتلك القوة والعزيمه والاراده وانا كان عند حلم ان اكون حاجه حلوة ومشرفه اهلى ساعدونى وانا صممت ان اوصل واكسر اى حاجز أو اى عقبه تواجهنى والحمدلله بالفعل عملت كده لكن دايما بنت الصعيد قويه وليس لضعيف

واجهتي أي انتقادات لممارستك رياضة شاقة كالجمباز ؟

طبعا، بس من الانتقادات دى انا كنت بحولها لكلام إيجابي بالنسبه لي علشان اكمل وأثبت لكل الناس اللي انتقادتني دى ان انا مافيش حاجه هتقدر توقفني عن حلمي وان انا فعلا هكون.

كلمة أثرت على نجاح ايمان وما زالت تتردد في ذهنها .. ما هي؟

سلبي: اول مره كنت ف ٦ابتدائي قالهالي واحد جيرانا قالي عمرك ما هتكوني حاجه ولا توصلي
ايجابي: كلمه سمعتها من مدرب كان بيدربني “لما تحس نفسك خلاص طاقتك خلصت قول لنفسك افتكر انت بدأت ليه”.

في وسطك العائلي .. من يدعمك؟ ومن ينتقدك؟

الكل بيدعمني

جامعة سوهاج كان لها دور في نجاحك؟

وصلتني اولا لمسابقات كتير ف العاب مختلفه كمان كانت سبب ليا بعد فضل ربنا ف ان اشتغل ف مدارس خاصه واكاديميات وكانت برضوا سبب ف مكان تدريبي وكمان هي السبب أن اتعرف على ناس تشجعني ان اكمل وناس تعلمني وكمان وصلتني أن أسافر واشارك ف بطولات، لكن لما اسافر تبع الجامعه كنت بشارك والحمدلله كنت مركز اول بس لكن بطولات جمباز تبع الاتحاد لا لأن اناسني مالوش بطولات جمباز ولازم اكون بلعب من سن اربع سنين او وانا صغيره.

واجهتي مشاكل مجتمعية بإسم العرف او الدين قبل كده ؟

كتير طبعا بس كنت بواجه طبعا وكنت دايما مصره انى اكمل طالما مش بعمل حاجه غلط .

كنت بقول دايما لنفسي انا مش بعمل حاجه غلط ولا انا بعرض جسمي .

ولا لابسه لبس مش كويس انا بلعب لعبه زيها زى اى لعبه تانيه .

وكمان دى رياضه لو فيها حاجه غلط مكنش حد لعبها ولا كانت طلعت منها ابطال.

طموح وخطة إيمان للمستقبل …

ابقي بطلة ف الجمباز وابقي مدربه عالميه ف الجمباز وبروفيسيره ف الجمباز.

أخيراً .. وجهي كلمة للبنات اللي بتحلم وخايفة تاخد خطوة لتحقيق أحلامها بسبب نظرة المجتمع

البنت بطبعا قويه ولازم كل بنت عندها حلم تكمل لحد ما توصل للحلم ده .

ويكون عندها عزيمه وإصرار شديد ع كده وتحول كل انتقادات الناس لكلام إيجابي يشجعها ع أنها تكمل.

وتثبت لنفسها وللناس كلها انها بنت قويه وتقدر تكسر كل حواجز الخوف اللي جواها.

وتصمم ع انها تشوف نفسها حاجه كبيره وطول ماهي عايشه وفيها لسه النفس.

يبقي تبدأ من تاني وتكمل وماتخليش اي مجال للخوف أو الكسل أو الياس ف حياتها .

لا تفتكر دايما أنها هي الاقوى من اي ظروف ومهما واجهتها اى مشاكل ف حياتها تفتكر اي الحلو اللي ف حلمها وتكمل علشانه.