سعيد نينو للمحايد الإخباري : شايف نفسي بعد 5 سنين من اعظم الديزاينر فی العالم

حوار/إيمان عصام

هناك العديد من النماذج الشبابية الناجحة في مجتمعنا، التی تسعى لتحقيق أحلامها، وتضع أهدافها نصب أعينها محاولة منها في تطوير نفسها والإرتقاء بالمجتمع ومن هذه النماذج الناجحة، الشاب العشرينی “سعيد محمود”.

في البداية..من هو “سعيد نينو ” ؟

أنا سعيد محمود وشهرتی”سعيد نينو” بدأت فوتوشوب وأنا عمری 14 سنة كنت فی الصف الثالث الإعدادى ،ولفت انتباهى أهمية برنامج الفوتوشوب واتعلمت دراسته بمفردى من خلال الإنترنت وكنت أحب رسم الشخصيات والأماكن وهذا ما دفعنى لتعلم البرامج الخاصة بتعديل الصور مثل برنامج فوتوشينا وفوتو فلتر.

كيف بدأت تعلم الفوتوشوب والتصميم وهل واجهتك مشاكل اثناء التعلم؟

طبعا كان فی مشاكل كتير فی الاول منها ان مكنش فيه نت فی البيت بس ميأستش وعافرت كنت بحوش فلوس علشان أروح بيها «السايبر» أقعد نص ساعة وامسك ورقة وقلم وأكتب الخطوات ولسه معايا الورق اللى كنت بتعلم فيه لحد دلوقتى ومعظم أعمالى تصوير فون مش كاميرا بروفيشنال .

متی استلمت أول مكافأة عن تصميماتك؟

اول فلوس مسكتها من بعد ما عملت بوستر أغنية “سوء تفاهم” لعلی الشاعر فى 2015 ، وبعدين بدأت أطور وأشتغل علی نفسي وبدأت أعمل شير لشغلى لحد ما اتعرفت على الفيسبوك وبقى عندى ٩ آلاف متابع وبعدها اتعاملت مع فنانين ومغنيين وفرى لانسر وعملتلهم بوسترات أغانى وتيكيت حفلات.

ماهی أهم إنجازاتك فی الفوتوشوب ؟

حاجات كتير جدا منها أول صورة شهرتنى و هى إنى كنت بصور نفسى بفون و أنا صغير و أنا كبير و كانت جابت تريند فى 2014 بعدها عملت تصميم بوستر أغنية سوء تفاهم لعلى الشاعر وبوسترات لأغانى راب فى مصر لأكتر من مغنى بجانب شغلی مع فنانين كتير زی أحمد كامل، طارق الشيخ ،صابرين النجيلى ،احمد السويسى، عمر ال عوضة، والمؤلف أيمن سليم.
من ضمن الحاجات اللی حابب أتكلم عنها هی لما عملت تصميم اسمه Happy Balloons و تم الاعجاب بيه من قبل شركة adobe علي تويتر، وتصميم “فی الحب” وتصميم “انعكاس الوحدة ” وشركة adobe creative cloud عملتلی لايك عليهم علی انستجرام.
عملت تصميمات كتيرة مؤثرة على السوشيال ميديا و مبسوط من اى حاجه عملتها و عندى فوق ألف تصميم و الحمدلله معظمهم أخد حقه و بعضهم اتظلم ،وعملت ألبوم ” القاهرة فى الفضاء ” و جاب مشاهدات عالية و تريند وعملت ألبوم عبارة عن تحويل بيوت الكرتون إلى 3d زي بيت اسبونج بوب ،كوردج الجبان، بيسبسبوبى ،فتيات القوة.

أحيانا يصاب الإنسان بالملل..هل هناك أوقات تشعر فيها أنك محبط وغير قادر على الاستمرار؟
أكيد طبعاً فی فترات بحس بالتعب النفسى و الزهق لأن مفيش افكار،فباخد ريست مع نفسى و مبقولش لحد حاجة
بيبقی موضوع بشكل خاص و بعدين انزل تصميمات جديدة،
ولما ألاقي دافع أو طاقة ايجابية أو جمهور مستنى الجديد دماغى بتشتغل و بعمل شغل،بس أكتر حاجة أثرت فيا وكنت مقرر انی مش هكمل تانی هی يوم لما اتقفل الاكونت الرسمی بتاعی فی 2019 بعد ماكان وصل 22 ألف متابع بس لقيت جمهور بيدعمنى و مستنى كل جديد و عملت أكونت جديد و بدأت أشتغل من جديد و الحمدلله ربنا كرمنى و وصلت ل ٦ ألاف متابع و فضلت مقتنع إن النجاح فيا مش فى أكونتى.

من مثلك الأعلى في الحياة؟

مثلی الأعلى في حياتی هو أنا علشان أنا الى عيشت حياتى محدش عاشها وأنا اللی ساعدت نفسي واشتغلت عليها.

أين ترى “سعيد نينو ” بعد خمس سنوات؟

طبعا لو ربنا كتبلى أعيش أكتر و حياتى تتعدل هبقي من ضمن أعظم ديزاينر فى العالم و ده هدفى إن شاء الله.

ماالذي يدفعك للاستمرار والاكمال في شغلك؟

الدعم اللی باخده من الناس والتشجيع والطاقة الإيجابية بجانب شغفي طبعا، شدة سعادتى لما بلاقى تفاعل كبير على شغلى ووقتها بحس إنى حطيت رجلى على أول الطريق.

وأخيرًا..بما تنصح الشباب فی بداية حياتهم ؟

أحب أقول لكل واحد فی سنی ركز فى شغلك واعمل موازنة بين حياتك الشخصية و شغلك و علاقاتك مع الناس و اعرف إن لكل مجتهد نصيب ،وحينما تتوفر الإرادة تتوفر الوسيلة،اعمل شغل و ارميه و ربنا هيديلك على قد تعبك.

شاهد أيضاً

رئيس قسم الإرشاد بزراعة سوهاج: في كافة المجالات يعمل خريج قسم الإرشاد الزراعي والمجتمع الريفي

حوار: نورا محمد مع فجر تقدم كليات الزراعة بكل أنحاء جمهورية مصر العربية و رفع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*