فرج البنا .. خطوات واثقة وعام 2021 عام الحصاد

حوار : بسنت تاج الدين

كل الشِدة هتعدّي وكل الهَدر يتدّاوَى وكل لِجام هيتقطّع ميزان حظك هيتساوَى .. هتتساوَى هتتعدل هتتغيّر هتتبدّل وهنعافر وهنكمل وهنحقق وهنصدق دنيا ما فيها غير صادقين ولَاجل وجود رجال ثابتين تمَيّل مهما هتمَيّل وتَد … زي الجبل واقفين

تلك كانت كلمات الشاعر فرج البنا شاعر عامية من البحيرة يبلغ 25سنة حاصل على دبلومة تكنولوجيا بترول يرئس لجنة تقييم الشعر بمبادرة حكاية كاتب , و المدير العام وعضو مؤسس لمبادرة أبناء الأدب رئيس القسم الأدبي لملتقى كُتابنا العرب , و منسق عام محافظة البحيرة في مبادرة بين الكلمات.

في بداية حوارنا معه سألناه عن بداية رحلته في طريق الشعر تأليفه والقاءه , قال رحلتي بدأت بالشغف الأول من الابتدائي في حفلات المدرسة والإذاعة و كنت بميل إني أسمع الناس بتاعة الشعر بالذات بما إني كنت بنظم الحاجات دي في فترة دراستي ومعايا شهادات تقدير من مدرستي بيها بس وقتها كنت بلعب كورة ف مكنتش مهتم بالقدر الكافي.

بعدها وانا ١٥ سنة تقريبا ابتديت اني احاول واكتب ف اجندة كده بس مكنتش بعرضه لحد ومن غير اي دراسه للموضوع هو كلام جوايا بطلعه و اول قصة الحب الاول فتحت ليا الطريق اكتر بعد الجرح الاول .

_ و كيف بدأت عرض شعرك للعامة حتى وصلت لتوقيع أو ل ديوان ؟

والله الموضوع كله كان صدفة حتى ظهوري عى لسوشيال ميديا لأني مكنتش مهتم بالموضوع ومش في دماغي السوشيال ومبميلهاش انا بكتب تقريبا من ١١ سنة ويعتبر ظهوري من سنة واحدة أو أقل ,

من مبادرة حكاية كاتب بدأت بأني عضو ف لجنة تقييم الشعر وكنت بشتغل على نفسي وأطور من نفسي مقارنة بالشعر اللي كنت بقيمه وأساليبه ((مشواري مفيهوش غيري)) ,ودلوقتي انا رئيس لجنة تقييم الشعر ف المبادرة , وعملت معاهم ديوان مجمع سكان الليل بقصيدتين طيفها، كل ده كان ليه.

_ تقدر توصف انها سنة حظ ليك بتوقيعك لديوان مادة خام الديوان الأول ليك ؟

ممكن نغير سنة الحظ ونخليها سنة الحصاد لإني تعبت جدا عشان أعلم نفسي وأطور كتاباتي عشان تناسب جميع الأعمار ، ف معتقدش إن في حظ في الموضوع الحكاية كلها تعب واجتهاد وربنا بيحدد معاد الوصول.

_ ما هي خططك للفترة الجاية ؟

بخطط ان شاء الله أزود حفلاتي اكتر واكتر لحد ما اشوف نفسي استحق اقف على الساقية منفرد , أنا عملت ٤ حفلات وشغال على اتنين كمان حاليا , وأكيد قدام عيني جائزة أحمد فؤاد نجم.

_هل ترى دعم من وزارة الثقافة للشعراء الشباب؟

الموضوع بالنسبالي نسبي الي حد ما لإني متواصلتش مع حد من الوزارة بس اعتقد الموضوع في تبسيط وتسهيل للشباب بالأعمال تبع الوزارة وحاليا فعلا في ورق مننا كمبادرة بين الكلمات اللي انا منسق عام محافظة البحيرة فيها داخل الوزارة للعمل واقعيا من خلال الوزارة وعلى وشك الانتهاء من الاجراءات بالتسجيل للمبادرة.

_بتنصح أي حد شايف في نفسه الموهبة انه يبدأ خطواته ازاي ويثقل الموهبة دي ازاي ؟

لنصيحة الاولي والاخيرة والاهم حب الخير للغير مترتب عليها حاجات كتير جدا من فضل ربنا للمجتهد + طبعا اشتغل على نفسك وحاول واغلط هتقع وهتقوم اقوى وافضل وانت متعلم من غلطك الفايت و كلمة لأي حد وصل لدرجة من النجاح متنساش الناس اللي تحتك وساعدهم على قد ما تقدر هتلاقي ربنا بيزيدك اكتر من غير مجهود وافتكر ان ربنا بيديك عشان تدي غيرك مش تتعالى عليه.

و تثقيل الموهبة يكون بالقراءة ثم القراءة والإيمان بالنفس إن في موهبة ده دافع مهم جدا للأستمرارية وكمان الثبات النفسي ف سماع النقد لان أي شاعر في مصر اتهان بالمعني الحرفي انتقادات على كلامه في اللي خدها دافع وحسّن وطور وفي اللي وقف عندها ومكملش خالص.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *