الفنان مهاب طارق في حوار خاص مع المحايد الإخباري لكشف موهبته

قد كشف لنا أحد الفنانين الصاعدين أبرز التصريحات حول حياته وهويته من خلال حواره مع جريدة المحابد الإخباري إنه  الفنان مهاب طارق محمد محمد يونس الذي يبلغ من العمر 19 عاما ابن محافظة المنصورة والذي يدرس في صنايع تبريد وتكييف .

بدأت الرسم من حوالي خمس سنين من سنة 2016، كانت بداية صعبة اللي هو أنا في مكان مفهوش إهتمام بالفن والرسم وكدا فكنت بعافر لوحدي كتير بس طبعاً والدتي ووالدي ساعدوني أكتر بما أنهم كانو رسامين زمان، وفجأة قررت اني اخد كورسات بس للأسف اخدت كورس مكنش فيه استفادة كبيرة فمكملتش فيه وكملت تعليم مع نفسي، فبدأت أعمل اسكيتشات ورسومات يومياً لايف وصور وكل ده أستمر لمدة سنتين وقدرت اتعلم مع نفسي وعرفت الأساسيات ودرست شوية كتار منها.

اه في ناس كتير شجعتني في الأول وبشكرهم جداً وأولهم والدتي ووالدي وأختي وأخويا كانوا بيجبولي الأدوات اللي مطلوبة للرسم اللي مكنتش بقدر اشتريها، وكمان كان في أصحاب ليا من تيمات تطوعية كنت مشارك فيها، ومنهم أشرف الصياد ومنه الشرقاوي الكاتبة اللي وقفت معايا جداً وفاطمة سعيد اللي رجعتني للرسم بعد ماكنت هبطله و في ناس تانية كتير وقفوا جمبي بصراحة، بس دول أكتر ناس وقفتهم وتشجيعهم ليا خلاني أبقى احلى في الرسم أكتر .

هو أنا مكنتش هتركه خالص لأ أنا كنت هبطل فترة مؤقته كدا، كنوع من الراحة و كنت هرجع تاني لأنه أياً كان بقيت بحس إن الرسم بقي جزء مني فمش هقدر اتركه ولا حتى أبطله لفترة طويلة ، بصراحة السبب الرئيسي لحتة اني افكر ف قرار زي ده وابعد شوية عن الرسم  هو إن نوعاً ما التشجيع الكامل للرسم مش موجود، بمعني إن فكرة الرسم كانت اه موجودة بس الفترة دي مكنش في مقدرتي اني  أشتري الأدوات و الخامات الكتيرة  اللي كانت مطلوبة، وكمان العائد المادي للرسم كان قليل وقد يصل إلى الإنعدام والتشجيع في السوشيال ميديا مكنتش متوفر بشكل كبير لإني احاول مبصش لنقطة زي دي.

انا كمهاب بحب كل أنواع الفن والرسم عموماً لأن لكل نوع من أنواع الرسم له مميزات مش موجودة في النوع التاني وكمان أن  كل نوع بيجذبني ليه بطريقته.

الحمدلله من أهم الإنجازات اللي حققتها طول الفترة اللي فاتت دي اني قدرت اشارك في معارض كتير و كمان مسابقات تبع المدرسة، ومن أهم المعارض اللي شاركت فيها كان معرض ” بنت الورد 1و2 ” و معرض “وايت روز 2 و وايت روز 3 ” و كمان معرض ” ارتور 2 “

هذه اللوحة لها الفضل فى شهرتى ونجاحى ويمكن سبب كونها كدا إنها من أخر الأعمال اللي شاركت بيها في معرض وايت روز3 الذي أقيم في الإسكندرية الفترة الماضية.

أولاً أنا بحلم إني أكون شخص ملهم و بيساعد كل الرسامين أو اكون سبب في أن ناس كتير من محبين الرسم يتعلموه ، وإني أكون حد يقدر إنه يكبر الفنانين اللي اخدوا الخطوة في إنهم يتعلموا،

وثانياً بقا هو أن يبقي في إهتمام أكتر بالمجال الفني في مصر لأن الرسم موهبة كبيرة، بس المشكلة  إننا مش بنلاقي للفاننين مهتمين كتير فنفسي بجد إن يبقي في إهتمام بالفن وتاريخه زي مافي بلاد كتير برا بتهتم بدا.