كابتن جودة

كتبت : فاطمة ابو النجا

كابتن جودة انسان متعلم غنى جدا إلا انه قرر يشتغل مدرس ألعاب فى مدرسة فى ( بيسة الكف ) قرية صغيرة جدا وجاهلة وحتى مافيهاش كهربا ودا الدور الى بيقوم بيه ( سمير غانم ) .. كابتن جودة لقى المدرسة فى حالة لا تحسد عليها ومافيهاش أى حاجة تقريبا فبدأ مشواره بتنظيم طابور للمدرسة وكان كل لما يشتكى للناظر كان يقوله ( الميزانية لا تسمح ) فكان الحل انه يعمل كل حاجة بأيده يوجدها من العدم ؛ عمل لبس للألعاب الرياضية دا حتى أثر على مدرسة الموسيقى وخلاها تحاول توجد ألآت موسيقية من اى حاجة ودا الدور الى بتقوم بيه ( سعاد نصر ) .. وبقى يعلم التلاميذ الشجاعة والصحة و كل حاجة من خلال أغانى هو بنفسه بيألفها والمدرسة بتلحنها وخلاص كدة قدى الواجب الى عليه و العيال بقت شاطرة لا أزاى أهالى القرية بقى الى هما أولياء الأمور فين ؟
طبعا كانوا جهله خايفين من الضاحى وعصابته،قدر الكابتن يقنعهم يتعلموا ومش بس كدة لا دا خلالهم بعد مرة ومرة ومرة ومرات كتير وجهد اكبر يقفوا فى وش الضاحى ومايخفوش كل دا علشان بس اتعلموا اتنورا .

اللقطة دى فى اخر حلقة كان سمير غانم بكل عزم بيقول ( ألفاً ) وهما يردوا وراه بكل شجاعة و فرحة ؛ فرحة الانتصار.

الجهل بيغمى العين بيصنع الخوف والجبن ؛ دى كانت رسالة المسلسل إلى حقيقة ممتع وهادف وكوميدى جدا الى بيعلم صح بشوية اغانى هادفة بشوية محتوى رائع بشوية ضحك .

حبيت كل لقطه فيه وكل حوار حرفيا رائع .. المسلسل بيلقى الضوء على حجات تانية عظيمة وصغيرة جدا لكن دى الفكرة الاساسية ( الجهل )، المسلسل من تأليف ( أحمد عوض ) وإخراج ( أحمد بدر الدين ) .