محمد محمود: والدي سبب موهبتي في الرسم وسأكمل مسيرته

محمد محمود شاب مصري صغير العمر يبلغ عمره 19 عامًا ،وبالرغم من صغر سنه إلا إنه بارع في المجال الفني، يقول محمد أنه اكتسب موهبته في الرسم من والده حيث كان يشجعه في بادئ الأمر ولكن تشيجعه لم يكن مؤقتاً بل استمر حتى الآن، ليصبح محمد واحدًا من الشباب الموهوبين بالرسم ليتجه رويدًا رويدًا بريشته صوب العالمية ، وكان للمحايد أن تجري معه الحوار التالي للتعرف على موهبته

في البداية عرفنا بنفسك..

“أنا محمد محمود حمدي عندي 19سنه، ساكن في مركز البداري التابع لمحافظة اسيوط، بدرس في الثانوية العامة”.

متي بدأت في إكتشاف موهبتك، وكيف استطعت تطويرها؟

“بدأت الرسم من أولى إبتدائي والحمدلله الموضوع بدأ يتطور بسرعة، وده شجعني وخلاني بدأت من رابعة إبتدائي أدخل مسابقات وكنت دائماً باخد المركز الأول في كل المسابقات إذا كانت علي مستوي المحافظة أو علي مستوي المركز، وبدأت بقا من الإعدادية ادخل مسابقات أكبر وأول مسابقة كانت ليا في إعدادي وصلت فيها للجمهورية وأخدت المركز الأول بس طبعاً معرفتش إني اثبت دا لانها  كانت محتاجة سفر ومكنش ينفع وقتها إني أسافر ، وفي المرحلة من اولي إعدادي لحد تالتة إعدادي دخلت أربع مسابقات علي مستوي المحافظة وأخدت المركز الأولى فيهم كلهم ، ولأن رسماتي كانت مميزة فكان في تشجيع كتير من المعلمين ليا ودا كان بيشجعني قوي “.

من أول من قام بتشجيعك ؟

” في بداية حكايتي مع الرسم أهلي هم أول وأكتر ناس شجعوني ومن بعدهم أصدقائي والمعلمين، وكانت أمي ربنا يرحمها بتشجعني كتير وبتساعدني وأبوي كمان ا كان من أكتر الناس اللي شجعتني ومازال بردو بيشجعني وخصوصاً ان هو بردو رسام محترف وأنا أخدت الموهبة دي منه لكن هو ترك الرسم من زمن وبيشجعني لحد دلوقتي إني احقق حلمي أكمل حلمه في نفس الوقت “.

إزاي طورت من مستواك وقدرت توصل للمستوى الحالي ؟

” أنا لما بدأت الرسم كان رسمي جميل من البداية وأنا مازلت لحد الآن بفتخر بنفسي وبمستوايا كل يوم اكتر من اليوم اللي قلبه، بالرغم من إني ماخدتش أي كورسات رسم وبردو مرحتش لحد علشان اتعلم علي ايده، دائماً كنت بحب أطوار نفسي بنفسي وابتكر طرق للرسم تساعدني للأحترافية، وبسرعة جداً رسمي اطور وكنت كل مادى بتعلم أكتر واتعمق أكتر واتعرف علي معلومات جديدة وخامات جديدة وكنت بتعرف علي فنانين كتير كانت أعمالهم المميزة بتشجعني، وكمان كنت بشوف فنانين أجانب وأعمالهم الخرافية كانت بتديني تحفيز إني اوصل لمستواهم واكون احسن منهم..

بدأ في الإعدادية مستوايا يتطور بسرعة واجيب أدوات مختلفة، وبعد لما رحت الثانوية العامة بدأت أشارك في مسابقات وكنت بطلع الأول فيها و الحمد لله اتكرمت كذا مرة في المدرسة واتكرمت بردو على مستوى محافظة أسيوط، وفي كلية الفنون الجميله كانوا بيبعتولي في مسابقات هناك وكنت بشارك فيها وفزت مرة بالمركز الاول ومرة تانية فزت بالمركز التالت، كل دا كان بيشجعني طبعاً إني أبدع وأكون أحسن من نفسي في المرحلة اللي قبلها، كنت ساعات بقعد فترات كتير مبرسمش خالص ولما أبدأ أرسم وأرجع تاني كان رجوعي بيبقي أقوى من الأول بكتير، طبعاً انا  مكانش عندي إمكانيات إني أبدع بطريقة معينة بس كنت بحاول علي قد ما أقدر أني أبدع وأطور في أعمالي “.

بتفضل أي نوع من أنواع الرسم المنتشرة الفترة الحالية؟

“بحب فن الجرافيك وفن الجداريات والرسم بالفحم والرصاص والألوان وبحب رسم الصور العميقة والصور اللي بتدي معني للواقع وبحب رسم التراث والفن القديم وطبعاً بعرف انحت علي الجبس ونحت الآيات القرآنية المزخرفة “.

هل شاركت ف أي مسابقات أو في معارض رسم  من قبل و حصلت على جوائز؟

“شاركت في مسابقات كتير كانت أغلبها بتبقا من ضمن المدرسة والحمدلله نجحت فيها كلها وأخدت المراكز العليا والأغلبية كانت المركز الاول، وشاركت مرة واحدة بس في معرض” جاليري لمسات” في القاهرة، وكانت أول خطوة إني أجرب حاجة جديدة في مجالي وانبسطت جدا جدا بالتجربة دي، وقدرت اتعرف علي فنانين كبار وعرفت منهم معلومات جميلة واكتسبت خبره

، وكمان أنا كان بيجيلي دعوات لحضور لمعارض كتير بس مكنتش بعرف أسافر وأشارك فيها  علشان المسافة اللي بين سكني وبين مكان إقامة المعرض ، لكن رغم دا مبسوط باللي وصلتله لحد دلوقتي ودا كله بكرم ربنا وعطفه عليا وبشكره جداً إنه منحني الموهبة الجميلة دي، ودا خلاني أخد عهد علي نفسي إني مستخدمش موهبتي دي غير في الخير وبس.

وبالنسبه للجوايز في جميع مسابقاتي كانت بتبقي شهايد تقدير، وساعات بتبقي أدوات رسم وأوقات تانية كانت بتبقي فلوس، بس عامةً أنا كل اللي بفكر فيه إني اكتسب خبرة ومعرفة وإني اتطور في مجالي واشارك رسوماتي في كل معارض مصر وبرا مصر واعرضها علي الناس كلها “.

ما أكثر لوحاتك تميزاً؟

“الرسمة دي لإني حسيت بتطور مستوايا فيها قوي “.

هل في فنان بتتمني مستواك يتطور ليصل لمرحلته الإبداعية في الرسم؟

” لا مفيش فنان معين اتمنى مستوايا يوصل لنفس مستواه، لأن كل واحد من الفنانين بيتميز في نقطة معينة، بس هو عامةً أنا بتمني مستوايا يتطور كل فترة اكتر من الفترة اللي قبلها وإن كل اللي حواليا يكونوا فخورين بيا واللي وصلت له”.

من الفنان أو الشخص الذي تتمنى لو رسمته رسمتك توصله ؟

” في كتير بتمنى إني موهبتي توصلهم ويتبرز دا في رسمتي ليهم زي محمد صلاح و أحمد حلمي و ميسي مثلاً “.

بتحلم بأي في مجالك ؟

” بحلم إني أوصل لدرجة القمة من الاحترافية وإني أوصل فني للعالم كله وبحلم إني الف العالم بفني وإبداعي، وإن يكون ليا مكانة مميزة ومعروفة، وإني اقدر أحقق حلم ابويا وأمي علشان أظل فخر لكل أهلي “.